أوت آلتنده نسج اولمش مهفهف منطق و برهان، صاغنده عقلى إستنطاق؛ مرفرف هر طرف، أذهان ”صَدَقْتَ“ دير كه: {لاَ إِلٰهَ إِلاَّ هُوَ}
يمين اولان شمالنده، ايدر وجدانى إستشهاد. أمامنده حسنِ خيردر، هدفنده سعادتدر. اونڭ مفتاحيدر هر دم كه: {لاَ إِلٰهَ إِلاَّ هُوَ}
أمام اولان وراسنده اوڭا مسند سماويدر كه، وحىِ محضِ ربّانى. بو شش جهت ضياداردر؛ بروجنده تجلّيدار كه: {لاَ إِلٰهَ إِلاَّ هُوَ}
أوت وسوسۀِ سارق، باوَهم شبهۀِ طارق، نه حدّى وار كه او مارق، گيره‌بيلسين بو بارق قصره. هم شارق كه، سور سوره‌لر شاهق، هر كلمه بر مَلكِ ناطق كه: {لاَ إِلٰهَ إِلاَّ هُوَ}
او قرآنِ عظيم الشان ناصل بر بحرِ توحيددر. بر تك قطره، مثال ايچون بر تك سورۀِ إخلاص.. فقط قيصه بر تك رمزى، نهايتسز رموزندن. بتون أنواعِ شركى ردّ ايدر، هم ده يدى أنواعِ توحيدى ايدر إثبات؛ اوچى منفى، اوچى مثبت شو آلتى جمله‌ده بردن:
برنجى جمله: {قُلْ هُوَ} قرينه‌سز إشارتدر. ديمك إطلاقله تعييندر. او تعيينده تعيّن وار. اَىْ {لاَ هُوَ اِلاَّ هُوَ}
شو توحيدِ شهوده بر إشارتدر. حقيقت‌بين نظر توحيده مستغرق اولورسه دير كه: {لاَ مَشْهُودَ اِلاَّ هُوَ}
ايكنجى جمله: {اَﷲُ اَحَدٌ} در كه، توحيدِ الوهيته تصريحدر. حقيقت، حق لسانى دير كه: {لاَ مَعْبُودَ اِلاَّ هُوَ}
اوچنجى جمله: {اَﷲُ الصَّمَدُ} در. ايكى جوهرِ توحيده صدفدر. برنجى دُرّى: توحيدِ ربوبيت. أوت نظامِ كون لسانى دير كه: {لاَ خَالِقَ اِلاَّ هُوَ}
ايكنجى دُرّى: توحيدِ قيّوميت. أوت سراسر كائناتده، وجود و هم بقاده، مؤثّره إحتياج لسانى دير كه: {لاَ قَيُّومَ اِلاَّ هُوَ}