جنابِ حقّه حدسز شكر و حمد ايدرم كه، إختيارلر رساله‌سنده‌كى اميديمى و مدافعات رساله‌سنده‌كى إدّعامى سزڭله تصديق ايتديردى. أوت {ِﷲِ الْحَمْدُ بِِعَدِدِ الذَّرَّاتِ مِنَ اْلاَزَلِ اِلَى اْلاَبَدِ} سزڭ ايله اوتوز بيڭه مقابل گلن اوتوز عبد الرحمانى، بلكه يوز اوتوز، بلكه بيڭ يوز اوتوز عبد الرحمانى رسالة النوره إحسان ايتدى. هم اونوتلميان، هر وقت يانمده بولنان قارداشلرم، رسالۀِ النوره سزڭ گبى پك جدّى صاحب و محافظ و وارث و حقيقت‌بىن و قيمتشناس ذاتلرڭ بنم يرمده بندن داها قوّتلى، إخلاصلى اولارق وظيفۀِ قرآنيه و ايمانيه‌ده چاليشدقلرينى گوردىگمدن، كمالِ فرح و سُرور و إطمئنان و إستراحتِ قلب ايله أجلمى و موتمى و قبريمى قارشيلايورم، بكله‌يورم. بن سزى يازيلريڭزده و خاطرمدن چيقميان خدماتڭزده گونده متعدّد دفعه‌لر گورويورم و سزه اولان إشتياقمى تطمين ايدييورم. سز ده بو بيچاره قارداشڭزى رساله‌لرده گوروب صحبت ايده‌بيليرسڭز. أهلِ حقيقتڭ صحبتنه زمان، مكان مانع اولماز؛ معنوى راديو حكمنده برى شرقده برى غربده، برى دنياده برى برزخده اولسه ده رابطۀِ قرآنيه و ايمانيه اونلرى بربريله قونوشديرر.
    ما شاء اﷲ، بارك اﷲ كراماتِ عَلويه‌نڭ رسالة النوره إمضاسنى بو زمانده تام تصديق ايتديرن كراماتِ قلمِ عَلوى (على) و قرآنه چوق قيمتدار خدمتى و معجزاتِ أحمديه‌نڭ (ع‌ص‌م) خارقه بر كرامتنى گوزلره گوسترن و قرآنڭ آلتون بر آناختارى اولان قلمِ خسروى؛ دگل يالڭز بزلرى، بلكه روحانيلرى و مَلكلرى ده سوينديرييورلر