بو دفعه، ألماس قلملى مباركلر طرفندن بر سؤال وار. شيمديلك جواب أليمده دگل. أگر أليمه ويريلسه، سزه گلير. هر گون خاطرمده بولنان رشدى، رأفت، سليمان، (ب‌م) و (ح‌ق) و عبد اﷲ و سائر إسملرينى بيان ايتمديگم قيمتدار قارداشلرم ايله خصوصى قونوشمديغمدن گوجنمه‌سينلر؛ چونكه خدمتڭزڭ عظمتى و أهمّيتى و معارضلرڭ قوّتى و شيطنتى نسبتنده إحتياطه و دقّته مجبورز.
    حافظ على ايله خسروڭ بربرلريله جدّى بر محويت ايچنده قارداشلق إرتباطلرى، رسالۀِ إخلاصڭ تام سرّينه مظهر اولديغڭزى بڭا إحساس ايتدى، اميدلريمى فوق العاده قوّتلنديردى.
    بن داها زياده يازاجقدم، فقط شيمدى بريسى پوسته‌خانه‌يه گيتمك اوزره اولديغى ايچون عجله ايتديگندن قيصه كسدم.
دعاڭزه محتاج
سعيد النورسى
* * *
بِاسْمِهِ سُبْحَانَهُ  ❊  وَاِنْ مِنْ شَيْءٍ اِلاَّ يُسَبِّحُ بِحَمْدِهِ
 اَلسَّلاَمُ عَلَيْكُمْ وَ رَحْمَةُ اﷲِ وَ بَرَكَاتُهُ بِعَدَدِ عَاشِرَاتِ دَقَائِقِ اَيَّامِ الْفِرَاقِ
    عزيز، صدّيق قارداشلرم و خدمتِ قرآنيه‌ده قوّتلى، درايتلى آرقداشلرم!
    بو زمان جماعت زمانيدر. أهمّيت و قيمت، شخصِ معنوى‌يه گوره اولور. مادّى و فردى و فانى شخصڭ ماهيتى نظره آلينماملى. خصوصًا بنم گبى بر بيچاره‌نڭ قيمتندن بيڭ درجه زياده أهمّيت ويرمكله، بر بطمانى قالديرميان ضعيف اوموزينه، بيڭلر بطمان آغيرلغى يوكلنسه آلتنده أزيلير.