شاملى توفيقڭ إحتياطنى تقدير ايتمكله برابر، أسكى قيمتدار خدمتلرينڭ اونڭ دفترِ أعمالنه دائمى بر صورتده يازى يازمالرى ايچون، او دخى دائمى چاليشماسى گركدى. شكر ينه، ألماس قلميله وظيفه‌سنه باشلاماسى، روحمى اميدلر و إشتياقلرله نشئه‌لنديردى؛ بارلا حياتنى حسرتله خاطرلاتدى
    صبرى قارداش! إمامت وظيفه‌سنده رسالة النوره ضرر يوق، رخصتله عمل نيتيله شيمديلك چكيلمه
    خسرو قارداش! بشنجى شعاعڭ قيمتنى تام بيان و تقديرڭ بنى چوق مسرور ايتدى. ايكنجى دفعه يالديزلى بر قرآنى يازديغڭ، بنى فوق العاده مفرّح ايتدى. هم بنم ايچون ده يڭى رساله‌لرى مبارك قلمڭله (حاشيه) إستنساخ ايتديگڭ، بنى منّتدارلق حسّندن مسرورانه آغلاتدى
    رشدى و رأفتڭ صحّتلرى و كمالِ صداقت و ثباتلرى، حزين أنديشه‌لريمى إزاله ايتدى. إسپارطه طلبه‌لرى خاطرلرى ايچون، بن إسپارطه‌يى كندى قريه‌م نورس ايله برابر دعامده داخل ايدييورم. حتّى أمواتنه، نورس أمواتى گبى دعا ايدييورم. حقيقى وطنم و مملكتم نظريله او ولايته باقييورم
    ماكينه‌سى قوّتلى على قارداش! سزلرڭ خالصانه و جدّى فعاليتڭزدن، رسالۀِ النوره سزلر گبى صارصيلماز چوق طلبه‌لر ظهور و دوام ايتدكلرينى اُميد ايدردم. بيلديگم عبد اﷲ گبى و بيلمديگم عموم قارداشلريمه سلاممى و بتون معنوى قزانجلريمه اونلرى تشريك ايتديگمى تبليغ ايديڭز. مخابره‌مده إسملرينى يازماديغم و خاطرمده يازديغم قيمتدار قارداشلرمله چوق علاقه‌دارم