بر قاچ گوندن بَرى استاديمزڭ زيارتنه گيتمه‌ديگمزدن، قارداشم أمين ايله برابر استاديمزڭ زيارتنه گيتدك. ايكندى وقتى برابر نماز قيلدقدن صوڭره بزه أمر ايتدى كه: ”سزه يمك يديره‌جگم، بوراده تعيينڭز وار.“ مكرّرًا، ”يمزسه‌ڭز بڭا طوقوز ضرر اولور“ ديدى. ”چونكه ييه‌جگڭزه قارشى جنابِ حق گوندره‌جك.“
    يمك يمكدن عفويمزى رجا ايتدك ايسه ده أمر ايتدى كه: ”رزقڭزى يه‌يڭ، بڭا گلير.“ أمرينى قيرمامق ايچون، لطف بيورديغى تره ياغى و قباق طاتليسنى أكمكله يمگه باشلادق. داها سفره‌ده ايكن، اُميد ايديلمه‌ين بر وقتده، بر طرزده و عين وقتده بر آدم گلدى. ألنده ييديگمز قدر تازه أكمك، عين ييديگمز مقدار (فندق قدر) تره ياغى و ديگر ألنده بزه ويريلنڭ تام مِثلى قباق طاتليسى اولارق قپويى آچدى. آرتيق تعجّب ايديله‌رك، هيچ بر جهتده تصادفه محل قالميه‌رق، رسالۀِ النور شاكردلرينڭ رزقنده‌كى بر بركتِ ربّانى‌يى گوزيمزله گوردك. استاديمز أمر ايتدى: ”إحسان اون مِثلى اولاجق. حالبوكه بو إكرام تام تامنه مِثليدر. ديمك، تعيين جهتى غلبه ايتدى. تعيين تأمينى ايسه، ميزان ايله اولور.“ صوڭره عين آقشامده، صدقه جهتى دخى حكمنى گوستردى. بز گوردك كه، أكمك اون مِثلى و تره ياغى طاتليسى او ده اون مِثلى و قباق طاتليسنى چوق سومديگى ايچون قباق، پاطلجان طورشيسى اون مِثلى؛ مأمولڭ خلافنه، رسالۀِ النوردن ايكنجى شعاعڭ بر هفته مطالعه‌سنه مقابل بر معنوى اجرت اولارق گلدى، گوزيمزله گوردك. ديمك، قباق طاتليسنڭ طاتليلغى، تره ياغى اون حلواسنه گيردى، كنديسى طورشيده قالدى.
    رسالۀِ النور شاكردلرينڭ، حسنِ خدمتنه عجله بر مكافات گوردكلرى گبى؛ خدمتده قصور ايدنلر دخى توقات ييدكلرى (إسپارطه‌ده اولديغى گبى) بوراده دخى گوزيمزله گوردك. پك چوق وقوعاتندن يالڭز بش آلتيسنى بيان ايدييورز:
    برنجيسى: بن (يعنى تحسين) بر گون، يڭى آچديغمز بر دكّان مشغله‌سيله بڭا أمر اولنان وظيفۀِ نوريه‌يى تنبللك ايدوب ياپامادم. عين وقتده شفقتلى بر توقات ييدم. دكّانده اوطوروركن بريسى بڭا گلدى، أمانت اولارق (١٠٠) ليرا تبديل اولمق ايچون بڭا ويردى. بو پاره‌نڭ صاحبنه، اﷲ ايچون بر خدمت ياپمق اوزره تبديل ايچون ماليه صندوغنه گىتدم. بو پاره‌لرى صاياركن، آرالرنده بر قلپ ليرا بولندى. بو يوزدن إفاده‌يه و سؤال و جوابه و مؤاخذه‌يه معروض قالديغم گبى، أويمزى ده تحرّى ايتمك ايجاب ايتدى. بنى محكمه‌يه ويرديلر. فقط بو تربيه و شفقت طوقادى اولمق جهتيله، ينه رسالۀِ النور كرامتنى گوستردى، ضررسز قورتولدق.