بو وقوعات نوعندن هم چوق وار، هم رسالۀِ النوره قارشى قصوره بناءً قطعيًا توقات اولديغنه شبهه‌مز قالمادى.
    تصديق ايدن رسالۀِ النور شاكردلرى أوت بن ده تصديق ايدرم
حلمى، أمين، تحسين سعيد
* * *
    هم رسالۀِ النورڭ سهولتِ إنتشارينڭ بر كرامتنى، بو مكتوبى يازديغمز زمانده و يمكده‌كى كرامت دقيقه‌سنده گوزيمزله گوردك. شويله كه
    أهمّيتلى يدى سكز رساله و إشاراتِ قرآنيه شعاعنى مهم بر مكتوبله برابر بر طوربه‌ده أهمّيتلى بر قارداشمزه بر شهره گوندرمشدك. شوفور او پاكتى دوشورمشدى. بويله بر زمانده بويله أثرلرى، منافقلر و جاسوسلر خبر آلمه‌دن، أمين بر أل ايله بش گون صوڭره ألمزه گچمه‌سى؛ قطعى قناعتمز گلدى كه، بر عنايت بزى حمايه ايدييور.
    هم رسالۀِ النور حقّنده عنايتِ ربّانيه‌نڭ لطيف بر حمايتى ده شودر كه: قراڭلق بر وضعيتده، قورقوتان بر زمانده، جاسوسلرڭ و تحرّى مأمورلرينڭ أوهاملرى و تجسّسلرى استاديمزڭ منزلنى صارماسى دقيقه‌سنده، بر فاره استاديمزڭ چورابنى آلدى. نه قدر آرادق، هيچ بر يرده بولامادق. او فاره‌نڭ يوواسنى گوردك. قابل دگل كه او چوراب گيرسين. ايكى گون صوڭره گوردك كه، او حيوان او چورابى گتيرمش اويله يره كه، صاقلانمش و محتوياتلرى اونوتلمش اولان محرم مكتوبلر و أوراقلرڭ تام ياننده بيراقمش. حالبوكه ايكى دفعه اورايه باقمشدق، گوره‌مه‌مشدك. هم او چورابى او يره گتيرمك؛ صوبه بوروسنه چيقوب يوقاريدن اولور. غايت قورناز و ذكى بر آدم آنجق او ايشى ياپار. هيچ بر جهتده تصادف إحتمالى قالمديغندن استاديمز ديدى: ”بو مكتوبلرى اورادن قالديره‌جغز.“ بز اونلره باقدق، گرچه سياستله علاقه‌لرى يوقدر. فقط وهّام جاسوسلره، عليهمزده حبّه‌يى قبّه ياپمغه أهمّيتلى بر وسيله اولوردى. بز هم اونلرى، هم داها بهانه‌يه مدار اولابيلن باشقه شيلرى قالديردق. او هيجانمزدن جاسوسلر خبر آلوب آڭلاديلر كه، حاضرلاندق. داها هجوم ايتمه‌دن يالڭز ايكنجى گون، أمين ألنده بر طوربه ايله منزله گيردى. تام آرقه‌سنده قره‌قول قوميسرى، گيزلى، حسّ ايتديرمه‌دن گيردى. أمينڭ ألنده كتاب يرنده يوغرت طوربه‌سنى گوردى، طورينى دگيشديردى. هر نه ايسه. الحاصل: رسالۀِ النورڭ إنتشارينه قارشى گلن بتون دشمن و جاسوسلره مقابل بر تك فاره چيقدى، پلانلرينى زير و زبر ايتدى.