قطعيًا سزه بيان ايدييورم كه: مسئله‌مزده هيچ بر تاريخده علمِ حقيقته و حقائقِ ايمانيه‌يه قارشى بو درجه غرضكارانه، غدّارانه تجاوز اولمامش. سزڭ دائرۀِ علميه‌ڭز و رياستڭز هر شيدن أوّل بو وظيفۀِ دينيه و علميه‌يى ياپماڭزى إقتضا ايدييور. بن بو صوڭ زهرلنديگم زمانده ئوله‌جگمى دوشوندكجه، ”بنم بدلمه أحمد حمدى نورلره صاحب چيقه‌جق“ دييه قلبم فرحلانييوردى، تسلّى بولويوردم. سزه محكمه مدافعاتمزدن بعض پارچه‌لر أوّلجه دائره‌ڭزه گوندرديگمز حالده؛ شيمدى تمام، مكمّل و عينِ حقيقت بر نسخه مدافعاتمى ده سزه گوندرييورم. اوڭا گوره سزڭ دلالتڭزله نورلرڭ سربستيتنه چاليشه‌جق ذاتلره بر مأخذ اولارق گوسترمك نيّتيله گوندردك.
❊ ❊ ❊
بِاسْمِهِ سُبْحَانَهُ
 اَلسَّلاَمُ عَلَيْكُمْ وَ رَحْمَةُ اﷲِ وَ بَرَكَاتُهُ اَبَدًا دَائِمًا
    عزيز، صدّيق قارداشلرم زعفرانبولى، أفلانى حواليسى نور شاكردلرى!
    سزلره، گوندرديگڭز نور أجزالرينڭ هديه‌سنه بيڭ بارك اﷲ، ما شاء اﷲ ديرز. جنابِ حق سزلرى ايكى جهانده مسعود أيله‌سين، آمين.