Сол тарапымдағы болашаққа құтылу жолын iздеп зер салдым. Қарасам менiң және басқалардың‚ болашақ ұрпақтың үлкен‚ әрi қараңғы қабiрi бейнесiнде көзiме көрiндi. Сүйiнiш орнына күйiнiш бердi.

Оңым мен солымнан шошынып‚ бүгiнгi күнге қарадым. Бүгiнгi күн бейқам және тарихи назарыма жартылай өлiп‚ жанталасқан денемнiң өлiгiн көтерiп бара жатқан табыт бейнесiнде көрiндi. Сосын бұл жақтан да үмiтiм үзiлiп‚ басымды көтерiп‚ өмiр ағашымның ұшына көз салдым. Қарасам ағаштың бiр ғана жемiсi бар‚ ол да менiң мәйiтiм. Ағаш ұшында маған қарап тұр. Бұл жақтан да үркiп‚ басымды төменге иiп‚ өмiр ағашының астына‚ тамырына қарадым. Қарасам төмендегi топырақ - сүйектерiмнiң топырағы о баста түзiлiп‚ денем жаратылған топырақпен араласып‚ аяқ асты тапталуда екенiн көрдiм. Ол да медет емес‚ қайта дертiме дерт қосты.

Соңыра шарасыздықтан артыма қарадым. Қарасам жалған‚ пәни дүние тұрақтай алмай жоқтыққа домалап барады. Дертiме дәрi емес‚ у сепкендей болды. Бұл жақтан да қайыр көре алмағандықтан‚ алдыңғы жаққа көз тастадым. Қарасам‚ қабiр есiгi тура жолымда айқын көрiнiп‚ аузы арандай ашылып маған қарап тұр. Арғы жағында мәңгiлiкке апаратын жол мен сол жолдағылар алыстан көзге көрiнедi.