مكتوبات | اون طوقوزنجى مكتوب | 182
(128-315)

حضرتِ بريده ابن حصيب الأسلمى طريقنده، نقلِ صحيح ايله بريده ديدى كه: بز، رسولِ أكرم عليه الصلاة والسلامڭ ياننده ايكن، بر سفرده بر أعرابى گلدى. بر آيت، يعنى بر معجزه ايستدى. رسولِ أكرم عليه الصلاة والسلام فرمان ايتدى: {قُلْ لِتِلْكَ الشَّجَرَةِ رَسُولُ اﷲِ يَدْعُوكِ} بر آغاجه إشارت ايتدى؛ آغاج صاغه و صوله مَيل ايده‌رك كوكلرينى يردن چيقاروب، حضورِ نبوى‌يه گلدى. {اَلسَّلاَمُ عَلَيْكَ يَا رَسُولَ اﷲِ} ديدى. صوڭره أعرابى ديدى: ”ينه يرينه گيتسين.“ أمر ايتدى، يرينه گيتدى. أعرابى ديدى: ”إذن وير، سڭا سجده ايده‌يم.“ ديدى: ”إذن يوق كيمسه‌يه.“ ديدى: ”اويله ايسه، سنڭ ألڭى آياغڭى اوپه‌جگم.“ إذن ويردى.


اوچنجى مثال: باشده صحيحِ مسلم، كتبِ صحيحه خبر ويرييورلر كه، جابر دييور: بز بر سفرده، رسولِ أكرم عليه الصلاة والسلام ايله برابردك. قضاىِ حاجت ايچون بر ير آرادى. ستّاره‌لى بر ير يوقدى. صوڭره گيتدى، ايكى آغاج ياننه. بر آغاجڭ دالنى طوتدى، چكدى. آغاج إطاعت ايده‌رك برابر گيتدى، اوته‌كى آغاجڭ ياننه گتيردى. مطيع دوه‌نڭ يولارينى طوتوب چكيلدكده گلديگى گبى، او ايكى آغاجى او صورتله يان يانه گتيردى. صوڭره ديدى: {اِلْتَئِمَا عَلَىَّ بِاِذْنِ اﷲِ} يعنى: ”اوستمه برلشڭز.“ ديدى. ايكيسى برلشه‌رك ستّاره اولديلر. آرقه‌لرنده قضاىِ حاجت ايتدكدن صوڭره اونلره أمر ايتدى، يرلرينه گيتديلر.

سس يوق

مكتوبات