برنجى حادثه: معنوى تواتر درجه‌سنده بر شهرتله، رسولِ أكرم عليه الصلاة والسلام أبو بكر الصدّيق ايله، كفّارڭ تعقيبندن قورتولمق ايچون تحصّن ايتدكلرى غارِ حرانڭ قپوسنده، ايكى نوبتجى گبى ايكى گوگرجين گلوب بكله‌مه‌لرى و ئورومجك دخى پرده‌دار گبى، خارقه بر طرزده، قالين بر آغ ايله مغاره قپوسنى اورتمه‌سيدر. حتّى رؤساىِ قُريشدن، رسولِ أكرم عليه الصلاة والسلامڭ ألى ايله غزوۀِ بدرده ئولديريلن اُبَى ابن خَلَف مغاره‌يه باقمش. آرقداشلرى ديمشلر: ”مغاره‌يه گيره‌لم.“ او ديمش: ”ناصل گيره‌لم؟ بوراده بر آغ گورويورم كه، حضرتِ محمّد تولّد ايتمه‌دن بو آغ ياپيلمش گبيدر. بو ايكى گوگرجين ايشته اوراده طورييور، آدم اولسه اوراده طورورلر مى؟“ ايشته بونڭ گبى، مبارك گوگرجين طائفه‌سى، فتحِ مكّه‌ده دخى رسولِ أكرم عليه الصلاة والسلامڭ باشى اوزرنده گولگه ياپدقلرينى، إمامِ جليل ابن وهب نقل ايدييور. هم نقلِ صحيح ايله حضرتِ عائشۀِ صدّيقه خبر ويرييور كه: گوگرجين گبى، داجين دينيلن بر قوش خانه‌مزده واردى. رسولِ أكرم عليه الصلاة والسلام حاضر اولسه ايدى هيچ دبه‌لنمزدى، سكوتله طوروردى. نه وقت رسولِ أكرم عليه الصلاة والسلام چيقسه ايدى، او قوش باشلاردى حركته؛ گيدردى گليردى، هيچ طورمييوردى. ديمك او قوش، رسولِ أكرم عليه الصلاة والسلامى ديڭله‌يوردى، حضورنده تمكين ايله سكوت ايدردى.

ايكنجى حادثه: بش آلتى طريقله معنوى بر تواتر حكمنى آلمش قورد حادثه‌سيدر كه؛ بو قصّۀِ عجيبه چوق طريقلرله مشهور صحابه‌لردن نقل ايديلمش. أزجمله: أبو سعيد الخدرى و سلمه ابن الأكوَعْ و ابن أبى وهب و أبو هريره و بر وقعه صاحبى چوبان (اُهبان) گبى متعدّد طريقلرله خبر ويرييورلر كه: بر قورد، كچيلردن بريسنى طوتمش؛ چوبان، قوردڭ ألندن قورتارمش. ذئب ديمش: ”اللّٰهدن قورقمادڭ، بنم رزقمى أليمدن آلدڭ.“ چوبان ديمش: ”عجائب، ذئب قونوشور مى؟“ ذئب اوڭا ديمش: ”عجيب سنڭ حالڭده‌در كه، بو يرڭ آرقه طرفنده بر ذات وار كه؛ سزى جنّته دعوت ايدييور، پيغمبردر، اونى طانيمييورسڭز!“ بتون طريقلر قوردڭ قونوشماسنده متّفق اولمقله برابر، قوّتلى بر طريق اولان أبو هريره إخبارنده دييور كه: چوبان قورده ديمش: ”بن گيده‌جگم؛ فقط كيم بنم كچيلريمه باقه‌جق؟“ ذئب ديمش: ”بن باقه‌جغم.“ چوبان ايسه، چوبانلغى قورده دور ايدوب گلمش. رسولِ أكرم عليه الصلاة والسلامى گورمش، ايمان ايتمش، دونوب گيتمش. ذئبى چوبان بولمش. ضايعات يوق. بر كچى اوڭا كسمش، چونكه اوڭا استادلق ايتمش.