مكتوبات | اون طوقوزنجى مكتوب | 241
(128-315)

هم إنجيلِ يوحنّا، اون آلتنجى باب، اون برنجى آيت: ”زيرا بو عالمڭ رئيسنڭ گلمه‌سنڭ حكمى گلمشدر.“ ايشته ”عالمڭ رئيسى“ (حاشيه) ألبته سيّد البشر اولان أحمدِ محمّد عليه الصلاة والسلامدر.


هم إنجيلِ يوحنّا، اون آلتنجى باب و اون اوچنجى آيت: ”امّا او حق روحى گلديگى زمان، سزى بِالجمله حقيقته إرشاد ايده‌جكدر. زيرا كنديسندن سويله‌مييور. بِالجمله ايشيتديگنى سويله‌يه‌رك، گله‌جك نسنه‌لردن سزه خبر ويره‌جك.“ ايشته بو آيت صريحدر. عجبا عموم إنسانلرى بردن حقيقته دعوت ايدن و هر خبرينى وحيدن ويرن و جبرائيلدن ايشيتديگنى سويله‌ين و قيامت و آخرتدن تفصيلاً خبر ويرن، محمّدِ عربى عليه الصلاة والسلامدن باشقه كيمدر و كيم اولابيلير؟


هم كتبِ أنبياده، رسولِ أكرم عليه الصلاة والسلامڭ محمّد، أحمد، مختار معناسنده سُريانى و عِبرانى إسملرى وار. ايشته:


حضرتِ شعيبڭ صحفنده إسمى، محمّد معناسنده {مُشَفَّحْ}در. هم توراتده ينه محمّد معناسنده {مُنحَمَنَّا}، هم نَبِىُّ الحرم معناسنده {حِمْياطا}. زبورده {اَلمُخْتَارْ} إسميله مسمّادر. ينه توراتده {الخَاتَمُ الخاتم}. هم توراتده و زبورده {مُقِيمُ السنّه}. هم صحفِ إبراهيم و توراتده {مازماز}در. هم توراتده {اَحْيَدْ}در.


سس يوق

مكتوبات