ثانيًا: آيتڭ صراحتنده ”يدى قات أرض“ ديمه‌مش. {اَﷲُ الَّذِى خَلَقَ سَبْعَ سَموَاتٍ وَمِنَ اْلاَرْضِ مِثْلَهُنَّ} إلٰى آخر. آيتڭ ظاهرى دييور كه: ”أرضى ده او سبعه سماوات گبى خلق ايتمش و مخلوقاتنه مسكن إتّخاذ ايتمش.“ يدى طبقه اولارق خلق ايتدم، ديمييور. مِثليت ايسه مخلوقيت و مخلوقاته مسكنيت جهتيله بر تشبيهدر.

ايكنجيسى: كُرۀِ أرض هر نه قدر سماواته نسبةً چوق كوچكدر، فقط حدسز مصنوعاتِ إلٰهيه‌نڭ مشهرى، مظهرى، محشرى، مركزى حكمنده اولديغندن؛ قلب، جسده مقابل گلديگى گبى، كُرۀِ أرض دخى، قوجه حدسز سماواته قارشى بر قلب و معنوى بر مركز حكمنده اولارق مقابل گلير. اونڭ ايچون زمينڭ كوچك مقياسده أسكيدن بَرى يدى (❊) إقليمى؛ هم آوروپا، آفريقا، اوقيانوسيا، ايكى آسيا، ايكى آمريقا ناملريله معروف يدى قطعه‌سى؛ هم دڭزله برابر شرق، غرب، شمال، جنوب، بو يوزده‌كى و يڭى دنيا يوزنده‌كى معلوم يدى قطعه‌سى؛ هم مركزندن تا قشرِ ظاهرى‌يه قدر حكمةً، فنًّا ثابت اولان متّصل و متنوّع يدى طبقه‌سى، هم ذى‌حيات ايچون مدارِ حيات اولمش يتمش بسيط و جزئى عنصرلرى تضمّن ايدوب و ”يدى قات“ تعبير ايديلن مشهور يدى نوع كلّى عنصرى؛ هم درت عنصر دينيلن صو، هوا، نار، طوپراق (تراب) ايله برابر، ”مواليدِ ثلاثه“ دينيلن معادن، نباتات و حيواناتڭ يدى طبقه‌لرى و يدى قات عالملرى؛ هم جنّ و عفريت و سائر مختلف ذى‌شعور و ذى‌حيات مخلوقلرڭ عالملرى و مسكنلرى اولديغى، چوق كثرتلى أهلِ كشف و أصحابِ شهودڭ شهادتيله ثابت يدى قات أرضڭ عالملرى؛ هم كُرۀِ أرضمزه بڭزه‌ين يدى كُرۀِ اُخرا دخى بولونماسنه، ذى‌حياته مقرّ و مسكن اولماسنه إشارةً يدى طبقه يعنى يدى كُرۀِ أرضيه بولونماسنه إشارةً كُرۀِ أرض دخى، يدى طبقه آياتِ قرآنيه‌دن فهم ايديلمشدر.