دردنجيسى: اون سكزنجى مكتوبده طبقاتِ أرضڭ عجائبنه دائر أهلِ كشفڭ طورِ عقل خارجنده بيان ايتدكلرى تصويراته دائر بر تمثيل ذكر ايديلمشدر. خلاصه‌سى شودر كه: كُرۀِ أرض، عالمِ شهادتده بر چكردكدر؛ عالمِ مثاليه و برزخيه‌ده بر بيوك آغاج گبى، سماواته اوموز اوموزه ووره‌جق بر عظمتده‌در. أهلِ كشفڭ كُرۀِ أرضده عفريتلره مخصوص طبقه‌سنى بيڭ سنه‌لك بر مسافه گورمه‌لرى، عالمِ شهادته عائد كُرۀِ أرضڭ چكردگنده دگل، بلكه عالمِ مثاليده‌كى داللرينڭ و طبقه‌لرينڭ تظاهريدر. مادام كُرۀِ أرضڭ ظاهرًا أهمّيتسز بر طبقه‌سنڭ بويله باشقه عالمده عظمتلى تظاهراتى وار؛ ألبته يدى قات سماواته مقابل يدى قات دينيله‌بيلير و مذكور نقطه‌لرى إخطار ايچون ايجاز ايله إعجازكارانه بر طرزده آياتِ قرآنيه، سماواتڭ يدى طبقه‌سنه قارشى بو كوچوجك أرضى مقابل گوسترمكله إشارت ايدييور.

شو آيتِ كريمه گبى متعدّد آيتلر، سماواتى يدى سما اولارق بيان ايدييور. إشارات الإعجاز تفسيرنده أسكى حربِ عمومينڭ برنجى سنه‌سنده جبهۀِ حربده إختصار مجبوريتيله غايت مجمل بيان ايتديگمز او مسئله‌نڭ يالڭز بر خلاصه‌سنى يازمق مناسبدر. شويله كه:

أسكى حكمت، سماواتى طوقوز تصوّر ايدوب، لسانِ شرعيده، عرش و كرسى يدى سماوات ايله برابر قبول ايدوب عجيب بر صورتله سماواتى تصوير ايتمشديلر. او أسكى حكمتڭ داهى حكماسنڭ شعشعه‌لى إفاده‌لرى، نوعِ بشرى چوق عصرلر مدّتنجه تحكّملرى آلتنده طوتمشلر. حتّى چوق أهلِ تفسير، آياتڭ ظاهرلرينى اونلرڭ مذهبنه گوره توفيق ايتمگه مجبور قالمشلر. او صورتله قرآنِ حكيمڭ إعجازينه بر درجه پرده چكيلمشدى. و حكمتِ جديده نامى ويريلن يڭى فلسفه ايسه، أسكى فلسفه‌نڭ مرور و عبوره و خرق و إلتيامه قابل اولميان سماوات حقّنده‌كى إفراطنه مقابل تفريط ايدوب، سماواتڭ وجودينى عادتا إنكار ايدييورلر. أوّلكيلر إفراط، صوڭره‌كيلر تفريط ايدوب حقيقتى تماميله گوستره‌مه‌مشلر. قرآنِ حكيمڭ حكمتِ قدسيه‌سى ايسه، او إفراط و تفريطى بيراقوب حدِّ وسطى إختيار ايدوب دير كه: صانعِ ذو الجلال، يدى قات سماواتى خلق ايتمشدر. حركت ايدن ييلديزلر ايسه، باليقلر گبى سما ايچنده گزرلر و تسبيح ايدرلر. حديثده {اَلسَّمَاءُ مَوْجٌ مَكْفُوفٌ} دينيلمش. يعنى: ”سما، أمواجى قرارداده اولمش بر دڭزدر.“