لمعه‌لر | اوتوزنجى لمعه | 801
(744-825)

إسمِ أعظمه عائد مسئله‌لرڭ إحاطه ايديلميه‌جك درجه‌ده گنيشلرى اولديغى گبى، عقل گورميه‌جك درجه‌ده اينجه‌لرى ده واردر. خصوصًا إسمِ حىّ و قيّومه و بِالخاصّه حياتڭ ايمان أركاننه قارشى رمزلرينه و بِالخاصّه قضا و قدر ركننه حياتڭ إشارتنه و إسمِ قيّومڭ برنجى شعاعنه هركسڭ فكرى يتيشمز، فقط حصّه‌سز ده قالماز؛ بلكه هر حالده ايماننى قوّتلنديرر. سعادتِ أبديه‌نڭ آناختارى اولان ايمانڭ قوّتلشمه‌سى أهمّيتى چوق عظيمدر. ايمانڭ بر ذرّه قدر قوّتى زياده اولماسى، بر خزينه‌در. إمامِ ربّانى أحمدِ فاروقى دييور كه: ”بر كوچك مسئلۀِ ايمانيه‌نڭ إنكشافى، بنم نظرمده يوزلر أذواق و كرامتلره مرجّحدر.“


بِسْمِ اﷲِ الرَّحْمٰنِ الرَّحِيمِ

بِيَدِهِ مَلَكُوتُ كُلِّ شَيْءٍ ❊ لَهُ مَقَالِيدُ السَّمٰوَاتِ وَ اْلاَرْضِ

وَاِنْ مِنْ شَيْءٍ اِلاَّ عِنْدَنَا خَزَائِنُهُ ❊ مَا مِنْ دَابَّةٍ اِلاَّ هُوَ اٰخِذٌ بِنَاصِيَتِهَا

گبى قيّوميتِ إلٰهيه‌يه إشارت ايدن آيتلرڭ بر نكته‌سى و إسمِ أعظم وياخود إسمِ أعظمڭ ايكى ضياسندن ايكنجى ضياسى وياخود إسمِ أعظمڭ آلتى نورندن آلتنجى نورى اولان ”قيّوم“ إسمنڭ بر جلوۀِ أعظمى، ذى القعده آينده عقلمه گوروندى. أسكيشهر حپسخانه‌سنده‌كى مساعده‌سزلگم جهتيله او نورِ أعظمى ألبته تماميله بيان ايده‌ميه‌جگم، فقط حضرتِ إمامِ على (ر‌ض)، قصيدۀِ أرجوزه‌سنده ”سكينه“ نامِ عاليسيله بيان ايتديگى إسمِ أعظم و جلجلوتيه‌سنده پك محتشم إسملرله إسمِ أعظم ايچنده بولونان او آلتى إسمى أڭ أعظم، أڭ أهمّيتلى طوتديغى ايچون و اونلرڭ بحثى ايچنده كرامتكارانه بزه تسلّى ويرديگى ايچون بو إسمِ قيّومه دخى، أوّلكى بش أسماء گبى، هيچ اولمازسه مختصر بر صورتده ”بش شعاع“ ايله، او نورِ أعظمه إشارت ايده‌جگز.

سس يوق

لمعه‌لر