برنجى شعاع: بو كائناتڭ خالقِ ذو الجلالى قيّومدر. يعنى بِذاته قائمدر، دائمدر، باقيدر. بتون أشيا اونڭله قائمدر، دوام ايدر و وجودده قالير، بقا بولور. أگر كائناتدن بر دقيقه‌جق اولسون او نسبتِ قيّوميت كسيلسه، كائنات محو اولور. هم او ذاتِ ذو الجلالڭ قيّوميتيله برابر قرآنِ عظيم الشانده فرمان ايتديگى گبى {لَيْسَ كَمِثْلِهِ شَيْءٌ} در. يعنى نه ذاتنده، نه صفاتنده، نه أفعالنده نظيرى يوقدر، مِثلى اولماز، شبيهى يوقدر، شريكى اولماز. أوت بتون كائناتى بتون شئوناتيله و كيفياتيله قبضۀِ ربوبيتنده طوتوب، بر خانه و بر سراى حكمنده كمالِ إنتظام ايله تدبير و إداره و تربيه ايدن بر ذاتِ أقدسه مِثل و مثيل و شريك و شبيه اولماز، محالدر. أوت بر ذات كه، اوڭا ييلديزلرڭ ايجادى ذرّه‌لر قدر قولاى گله.. و أڭ بيوك شى أڭ كوچك شى گبى قدرتنه مسخّر اوله.. و هيچ بر شى هيچ بر شيئه، هيچ بر فعل هيچ بر فعله مانع اولميه.. و حدسز أفراد، بر فرد گبى نظرنده حاضر اوله.. و بتون سسلرى بردن ايشيده.. و عمومڭ حدسز حاجاتنى بردن ياپابيله.. و كائناتڭ موجوداتنده‌كى بتون إنتظامات و ميزانلرڭ شهادتيله هيچ بر شى، هيچ بر حال، دائرۀِ مشيئت و إراده‌سندن خارج اولميه.. و هيچ بر مكانده اولماديغى حالده، هر بر يرده و هر بر مكانده قدرتيله، علميله حاضر اوله.. و هر شى اوندن نهايت درجه‌ده اوزاق اولديغى حالده، او ايسه هر شيئه نهايت درجه‌ده ياقين اولابيلن بر ذاتِ حىّ قيّومِ ذو الجلالڭ ألبته هيچ بر جهتله مِثلى، نظيرى، شريكى، وزيرى، ضدّى، نِدّى اولماز و اولماسى محالدر. يالڭز مَثل و تمثيل صورتنده شئوناتِ قدسيه‌سنه باقيله‌بيلير. رسالۀِ نورده‌كى بتون تمثيلات و تشبيهات، بو مَثل و تمثيل نوعندندرلر.