ايكنجى آيت ايسه: مقامِ جفريسى بيڭ اوچ يوز ايكى (١٣٠٢) ايده‌رك رسالۀِ نور مؤلّفنڭ قرآن درسنى آلديغى تاريخه تام تامنه توافق ايله رمزًا قرآنڭ باهر بر برهانى اولان رسائل النوره باقار

اوچنجى آيت ايسه: بيڭ اوچ يوز اوتوز سكز (١٣٣٨) اولديغندن حكمتِ قرآنيه‌يى آوروپا حكماسنه قارشى پارلاق بر صورتده گوستره‌بيلن و گوسترن رسالۀِ‌ النور مؤلّفى ”دار الحكمة الإسلاميه“ده حكمتِ قرآنيه‌يى مدافعه ايتمكله، حتّى إنگليزڭ باش پاپاسى سؤال ايتديگى و آلتى يوز كلمه ايله جواب ايستديگى آلتى سؤالنه آلتى كلمه ايله جواب ويرمكله برابر، إنزوايه گيروب بتون غيرتيله قرآنڭ إلهاماتندن رسالۀِ نورڭ مسئله‌لرينى إقتباسه باشلاديغى عين تاريخه تام تامنه توافقله رمزًا باقار

اون اوچنجى آيت: سورۀِ آلِ عمرانده {وَمَا يَعْلَمُ تَاْوِيلَهُ اِلاَّ اﷲُ وَالرَّاسِخُونَ فِى الْعِلْمِ}

اون دردنجى آيت: سورۀِ نساءده {لٰكِنِ الرَّاسِخُونَ فِى الْعِلْمِ مِنْهُمْ}

بو ايكى آيت بو عصره ده خصوصى باقارلر

برنجيسنڭ مئالى گوسترييور كه: أهلِ ضلالت متشابهاتِ قرآنيه‌يى ياڭليش تأويلات ايله تحريفنه و شبهه‌لرى چوغالتماسنه چاليشديغى بر زمانده، علمده رسوخى بولونان بر طائفه او متشابهاتِ قرآنيه‌نڭ حقيقى تأويللرينى بيان ايدوب و ايمان ايده‌رك او شبهاتى إزاله ايدر. بو كلّى معنانڭ هر عصرده ماصدقلرى و جزئياتلرى وار. حربِ عمومى واسطه‌سيله، بيڭ سنه‌دن بَرى قرآن عليهنده تراكم ايدن آوروپا إعتراضلرى و أوهاملرى عالمِ إسلام ايچنده يول بولوب ياييلديلر. او شبهاتڭ بر قسمى فنّى شكلنى گيدى، اورته‌يه چيقدى. بو شبهاتى و إعتراضلرى بو زمانده دفع ايدن باشده رسالۀِ‌ النور و شاكردلرى گورونديگندن، بو آيت بو عصره ده باقديغندن رسالۀِ‌ النور و شاكردلرينه رمزًا باقمقله برابر علماءِ متأخّرينڭ مذهبنه گوره {اِلاَّ اﷲُ} ده وقف ايديلمز. او حالده مقامِ جفريسى عينًا {اِنَّ اْلاِنْسَانَ لَيَطْغٰى} نڭ مقامى گبى بيڭ اوچ يوز قرق درت (١٣٤٤) ايده‌رك رسائل النور و شاكردلرينڭ ميدانِ مجاهدۀِ معنويه‌يه آتيلمالرى تاريخنه تام تامنه توافقله اونلرى ده بو آيتڭ حريمِ قدسيسنڭ ايچنه آلييور. هم حشرڭ أڭ قوّتلى و پارلاق بر برهانى اولان اوننجى سوزڭ أطرافه ياييلماسى تاريخنه و قرآنڭ قرق وجهله معجزه اولديغنى بيان ايدن يگرمى بشنجى سوزڭ إشتهارى هنگامنه، هم {اِنَّ اْلاِنْسَانَ لَيَطْغٰى} عددينه تام تامنه توافقله باقار