اون آلتنجى آيت: {لِلَّذِينَ اٰمَنُوا هُدًى وَ شِفَاءٌ} در. شو شفالى آيت چوق زماندر بنم دردلريمڭ شفاسى و علاجى اولديغى گبى أجزاخانۀِ كبراىِ إلٰهيه اولان قرآنِ حكيمڭ ترياقى علاجلرندن، رسالۀِ‌ النور أجزالرينڭ قوانوزلرندن آلارق بلكه بيڭ معنوى دردلريمه بيڭ قدسى شفايى بولدم و رسائل النور شاكردلرى دخى بولديلر. و فندن و فلسفه‌نڭ باتاقلغندن چيقان و تداويسى چوق مشكل اولان و زندقه خسته‌لغنه مبتلا اولانلردن چوقلرى اونڭله شفالرينى بولديلر

ايشته هر درده شفا اولان قرآنڭ علاجلرينڭ بو زمانده بر قسم قوانوزلرى حكمنده بولونان رسائل النور دخى بو شفادار آيتڭ بر مدارِ نظرى اولديغنه قوّتلى بر أماره شودر كه: بو آيتڭ مقامِ جفريسى اولان بيڭ اوچ يوز قرق آلتى (١٣٤٦) عددى رسائل النورڭ بيڭ اوچ يوز قرق آلتيده شفادارانه أطرافه إنتشارينڭ تاريخنه و معجزاتِ أحمديه عليه الصلاة والسلام نامنده اولان رسالۀِ خارقه‌نڭ زمانِ تأليفنه تام تامنه توافقيدر. شو توافق هم مناسبتِ معنويه‌يى تأييد و اونڭله تأيّد ايدر، هم رمزدن إشارت درجه‌سنه چيقارييور.

اون يدنجى آيت: {فَاِنْ تَوَلَّوْا فَقُلْ حَسْبِىَ اﷲُ لاَ اِلٰهَ اِلاَّ هُوَ عَلَيْهِ تَوَكَّلْتُ} ده‌كى {قُلْ حَسْبِىَ اﷲُ لاَ اِلٰهَ اِلاَّ هُوَ عَلَيْهِ تَوَكَّلْتُ} نڭ مقامِ جفريسى شدّه‌لى لاملر برر لام و شدّه‌لى كاف بر كاف صاييلمق جهتيله بيڭ اوچ يوز يگرمى طوقوز (١٣٢٩) ايده‌رك، حربِ عمومينڭ باشلانغيجى زماننده رسائل النورڭ باشلانغيجى اولان إشارات الإعجاز تفسيرينڭ تاريخِ تأليفنه تام تامنه توافقله برابر، شدّه‌لى كاف ايكى كاف صاييلمق جهتيله بيڭ اوچ يوز قرق طوقوز (١٣٤٩) ايده‌رك حربِ عمومينڭ ويرديگى صارصينتيلر زماننده رسائل النورڭ {حَسْبِىَ اﷲُ} دييه‌رك أهلِ دنيادن هيچ بر يرده حمايه گورمه‌دن بلكه تهاجمه هدف اولمقله برابر چكينميه‌رك يالڭز باشلريله مشكلات ايچنده أنوارِ قرآنيه‌يى نشر ايتدكلرى عين تاريخه تام تامنه توافقى ايسه، هر جهتيله عينِ شعور اولان آياتده ألبته تصادفى اولاماز. بلكه بو گبى آيتلر، أڭ مشكل زمان اولان بو عصره دخى خصوصى باقارلر و او آياتى كنديلرينه رهبر إتّخاذ ايدن بر قسم شاكردلرينه خصوصى إلتفات ايدوب إلتفاتلريله تشجيع ايدرلر