بو آيت، سابق آيتلر گبى مناسبتِ معنويه‌سى گرچه ظاهرًا گورونمييور؛ فقط بر جهتله رسائل النور ايله بر نوع مناسبتى واردر. شويله كه: اون اوچ سنه‌در (حاشيه) بو آيت رسالة النور مؤلّفنڭ و صوڭره خاص شاكردلرينڭ مغربدن صوڭره بر وردِ خصوصيلريدر. هم بو آيتڭ معناسنه بو زمانده تام مظهر و هركس اونلردن چكينمه‌سندن فتور گتيرميه‌رك {حَسْبِىَ اﷲُ} دييوب متوكّلانه مشكلاتِ عظيمه ايچنده أنوارِ ايمانيه‌يى و أسرارِ قرآنيه‌يى نشر ايدن، أهلِ ايمانى مأيوسيتدن قورتاران باشده رسالة النور و شاكردلريدر.

اون سكزنجى آيت: {اِنَّ حِزْبَ اﷲِ هُمُ الْغَالِبُونَ} در. بو آيت مئاليله حزب اللّٰهڭ ظاهرى مغلوبيتندن گلن مأيوسيتى إزاله ايچون قدسى بر تسلّى ويرر و حزب اﷲ اولان حزبِ قرآنينڭ حقيقتده و عاقبتده غلبه‌سنى خبر ويرر. و بو عصرده حزبِ قرآنينڭ حدسز أفرادندن رسائل النور شاكردلرى تظاهر ايتدكلرندن بو آيتڭ كلّى معناسنده خصوصى داخل اولمالرينه بر أماره اولارق مقامِ جفريسى اولان بيڭ اوچ يوز أللى (١٣٥٠) عددى ايله رسائل النور شاكردلرينڭ ظاهرى مغلوبيتلرى و بر سنه صوڭره محبوسيتلرى ايچنده معنوى غلبه‌لرى و متانتلرى و حقلرنده ياپيلان مدهش إمحا پلاننى عقيم بيراقان إخلاصلرى و قوّۀِ معنويه‌لرى تظاهر ايتمه‌سنڭ رومى تاريخى اولان بيڭ اوچ يوز أللى و أللى بر و أللى ايكى (١٣٥٠-١٣٥١-١٣٥٢) عددينه تام تامنه توافقى ألبته شفقتكارانه، تسلّيتدارانه بر رمزِ قرآنيدر

------------------------------------------------------------------------

حاشيه: تأليف تاريخنه گوره‌در