ايشته بو نمونه گوسترييور كه؛ پيغمبر عليه الصلاة والسلام معرفت اللّٰهده، وحدانيتڭ إثباتنده اويله بر مرتبه‌ده‌در، هيچ كيمسه يتيشه‌مز. و او واديده إمامِ مطلق اودر. هركس اونڭ آرقه‌سنده او خزينه‌يه گيده‌بيلير. معلومدر كه؛ مكمّل معرفتلر، علملر، صنعتلر أفكارڭ تلاحقيله و فكرلرڭ ترقّيله بربرينه إلتحاق ايده‌رك، بربرينڭ أثرينى تكميل ايده ايده، تا مكمّل بر صورت آلينير. بونڭ ايچوندر كه؛ ششخانه تفنگنى ايجاد ايدن اوسته، شيمدى بر ميتراليوزڭ اوسته‌سندن داها زياده هنرليدر

حالبوكه دقّتله جوشن الكبير مناجاتنى قلبڭ قولاغيله، خيالاً حضورِ سعادتده بولونماسيله، رسولِ اُمّيدن (عليه الصلاة والسلام) ديڭله‌ين آدم آڭلار و گورور كه؛ بيڭ‌ بر برهانى و تعريفى تضمّن ايدن و هر بريسى بر سلسلۀِ أفكارڭ نتيجه‌سى و توحيدڭ بر پنجره‌سى اولان او بيڭ‌ بر قدسى حقيقتلرى، بر اُمّى ذاتده (عليه الصلاة والسلام) و اُمّى بر قَومده و اُمّى بر محيطده و أهلِ فترت، كتابسز بر ملّتده موجدانه، مخترعانه، كيمسه‌يى تقليد ايتميه‌رك، معمّاىِ خلقتى و طلسمِ كائناتى كشف صورتنده، تك باشيله او مناجاتده بيان ايدييور. بو زمان گبى، بيڭلر كشّافڭ معاونتى و مناجاتلرى گبى تقليدكارانه دگل؛ بلكه قبّۀِ سما آلتنده، أهلِ سماواته ايشيتديرن و كائنات مسجدنده و او مسجدِ أكبرڭ جماعتِ كبراسنه ديڭلتديرن، حدسز رقّتدن و نهايتسز شفقتدن إنسانلره إمداد و مدد و مرحمت و نجات ايسته‌يور و دييور