اوچنجى مسئله: روايتده وار كه: ”آخر زمانڭ مستبد حاكملرى، خصوصًا دجّالڭ يالانجى جنّت و جهنّملرى بولونور.“ {َالْعِلْمُ عِنْدَ اﷲِ} بونڭ بر تأويلى شودر كه: حكومت دائره‌سنده قارشى قارشى‌يه قورولان و بربرينه باقان وضعيتده بولونان حپسخانه ايله ليسه مكتبى، برى حورى و غلمانڭ چركين بر تقليدى، ديگرى عذاب و زندان صورتنه گيره‌جك دييه بر إشارتدر

دردنجى مسئله: روايتده وار كه: ”آخر زمانده، اﷲ اﷲ دييه‌جك قالماز

{لاَ يَعْلَمُ الْغَيْبَ اِلاَّ اﷲُ} بونڭ بر تأويلى شو اولمق گركدر كه: ”اﷲ! اﷲ! اﷲ! دييوب ذكر ايدن تكيه‌لر، ذكرخانه‌لر، مدرسه‌لر قپاناجق و أذان و قامت گبى شعائرده إسم اﷲ يرينه باشقه إسم قونولاجق“ ديمكدر. يوقسه عموم إنسانلر كفرِ مطلقه دوشه‌جكلر ديمك دگلدر. چونكه اللّٰهى إنكار ايتمك، كائناتى إنكار ايتمك قدر عقلدن اوزاقدر. عموم دگل، بلكه أكثر إنسانلرده دخى وقوعنى عقل قبول ايتمز. كافرلر اللّٰهى إنكار ايتمييورلر، يالڭز صفاتنده خطا ايدييورلر

ديگر بر تأويلى شودر كه: قيامت قوپماسنڭ دهشتنى گورمه‌مك ايچون، مؤمنلرڭ روحلرى بر پارچه أوّل قبض ايديلير؛ قيامت، كافرلرڭ باشلرنده پاطلار

بشنجى مسئله: روايتده واردر كه: ”آخر زمانده دجّال گبى بر قسم شخصلر، الوهيت دعوا ايده‌جكلر و كنديلرينه سجده ايتديره‌جكلر

اﷲ أعْلَم، بونڭ بر تأويلى شودر كه: ناصلكه پادشاهى إنكار ايدن بر بدوى قوماندان، كندنده و باشقه قوماندانلرده، حاكميتلرى نسبتنده برر كوچك پادشاهلق تصوّر ايدر. عينًا اويله ده: طبيعيّون و مادّيون مذهبنڭ باشنه گچن او أشخاص، قوّتلرى نسبتنده كنديلرنده بر نوع ربوبيت تخيّل ايدرلر و رعيتنى كندى قوّتى ايچون كندينه و هيكللرينه عبوديتكارانه سرفرو ايتديررلر، باشلرينى ركوعه گتيررلر ديمكدر