مقدّمه بيتدى، مسئله‌لره باشلايورز

(شيمديلك او حادثاتِ غيبيه‌نڭ يوزر مثاللرندن، ملحدلر طرفندن عوامڭ عقيده‌لرينى بوزمق فكريله إشاعه ايديلن يگرمى اوچ مسئله‌لرى، توفيقِ ربّانى ايله غايت مختصر بر صورتده بيان ايديله‌جك. و او مسئله‌لر ملحدلرڭ تخمينى گبى ضرر ويرمه‌مكله برابر، هر برى بر لمعۀِ إعجازِ نبوى اولديغى گورونمكله و حقيقى تأويللرى إثبات و إظهار ايديلمكله عقيدۀِ عوامى قوّتلنديرمگه مهمّ بر سبب اولماسنى رحمتِ ربّانيه‌دن رجا ايدوب خطيئاتمى و غلطاتمى عفو و مغفرت آلتنه آلماسنى ربِّ رحيممدن نياز ايدرم

بشنجى شعاعڭ ايكنجى مقامى و مسئله‌لرى

حاشيه: آرقه‌ده گله‌جك برنجى مسئله‌نڭ يازيلديغندن خيلى زمان صوڭره ظهور ايدن بر حادثه تام تأويلنى گوسترمش. شويله كه: حديثده (او سفيان بر صو ايچه‌جك، ألى دلينه‌جك) دينيلمش. يعنى بر چشيد صو اولان راقى‌يى صو گبى چوق ايچه‌جك و او سببدن بطنى صو طولومبه‌سى گبى اولاجق و او صو خسته‌لغى يوزندن ظلم و حيله ايله طوپلاديغى ميليونلر مال صو گبى ألندن آقاجق، أجنبى دوقتورلرڭ بوغازينه گيره‌جك. مسموعاتمه نظرًا اوچ سنه‌ده اوچ ميليونه ياقين ليرالرى تداويسنه غايت إسراف ايله صرف ايدن (بر إنسان) عصريمزده گوروندى. ”بو حديثڭ تأويلنى بنده گوريڭز“ حياتنڭ لسانِ حاليله ديدى. هم (بر صو ايچه‌جك، ألى دلينه‌جك) اولان قدسى سوز نه قدر معنيدار و معجزه‌كار و يوكسك و جمعيتلى اولديغنى وفاتيله بيلديردى، گيتدى