برنجيسى: {وَ اَوْحٰى رَبُّكَ اِلَى النَّحْلِ اَنِ اتَّخِذِى مِنَ الْجِبَالِ بُيُوتًا ... إلى آخره} أوت بال آريسى فطرتجه و وظيفه‌جه اويله بر معجزۀِ قدرتدر كه؛ قوجه سورۀِ نحل، اونڭ إسميله تسميه ايديلمش. چونكه او كوچوجك بال ماكينه‌سنڭ ذرّه‌جك باشنده، اونڭ أهمّيتلى وظيفه‌سنڭ مكمّل پروغرامنى يازمق و كوچوجك قارننده طعاملرڭ أڭ طاتليسنى قويمق و پيشيرمك و سونگوجگنده ذى‌حيات أعضالرى تخريب ايتمك و ئولديرمك خاصيتنده بولونان زهرى او عضوجغنه و جسمنه ضرر ويرمه‌دن يرلشديرمك؛ نهايت دقّت و علم ايله و غايت حكمت و إراده ايله و تام بر إنتظام و موازنه ايله اولديغندن، شعورسز، إنتظامسز، ميزانسز اولان طبيعت و تصادف گبى شيلر ألبته مداخله ايده‌مزلر و قاريشه‌مازلر. ايشته بو اوچ جهتله معجزه‌لى بو صنعتِ إلٰهيه‌نڭ و بو فعلِ ربّانينڭ، بتون زمين يوزنده حدسز آريلرده، عين حكمتله، عين دقّتله، عين ميزانده، عين آنده، عين طرزده ظهورى و إحاطه‌سى، بداهتله وحدتى إثبات ايدر

ايكنجى آيت: {وَ اِنَّ لَكُمْ فِى اْلاَنَْعَامِ لَعِبْرَةً نُسْقِيكُمْ مِمَّا فِى بُطُونِهِ مِنْ بَيْنِ فَرْثٍ وَ دَمٍ لَبَنًا خَالِصًا سَائِغًا لِلشَّارِبِينَ} آيتى، عبرت‌فشان بر فرماندر. أوت باشده اينك و دوه و كچى و قويون اولارق سوت فابريقه‌لرى اولان والده‌لرڭ ممه‌لرنده، قان و فيشقى ايچنده بولاشديرمادن و بولانديرمادن و اونلره بتون بتون مخالف اولارق خالص، تميز، صافى، مُغَدّى، خوش، بياض بر سوتى قويمق؛ و ياورولرينه قارشى او سوتدن داها زياده خوش، شيرين، طاتلى، قيمتلى و فداكارانه بر شفقتى قلبلرينه بيراقمق؛ ألبته او درجه بر رحمت، بر حكمت، بر علم، بر قدرت و بر إختيار و دقّت ايستر كه؛ فورطنه‌لى تصادفلرڭ و قاريشديريجى عنصرلرڭ و كور قوّتلرڭ هيچ بر جهتله ايشلرى اولاماز. ايشته بويله غايت معجزه‌لى و حكمتلى بو صنعتِ ربّانيه‌نڭ و بو فعلِ إلٰهينڭ، عموم روىِ زمينده، يوز بيڭلرله نوعلرڭ، حدسز والده‌لرينڭ قلبلرنده و ممه‌لرنده عين آنده، عين طرزده، عين حكمت و عين دقّت ايله تجلّيسى و تصرّفى و ياپماسى و إحاطه‌سى، بداهتله وحدتى إثبات ايدر