ملائكه‌يه ايمان ركننڭ كلّى ميوه‌لرندن بريسنه، يگرمى ايكنجى سوزڭ ايكنجى مقامنده شويله إشارت ايديلمش كه؛ عزرائيل عليه السلام جنابِ حقّه مناجات ايدوب ديمش: ”قبضِ أرواح وظيفه‌سنده سنڭ عبادڭ بندن كوسه‌جكلر، شكوا ايده‌جكلر.“ اوڭا جوابًا دينيلمش: ”سنڭ وظيفه‌ڭه خسته‌لقلرى و مصيبتلرى پرده ياپاجغم؛ تا عباديمڭ شكوالرى اونلره گيتسين، سڭا گلمه‌سين.“ عينًا بو پرده‌لر گبى عزرائيل عليه السلامڭ وظيفه‌سى ده بر پرده‌در. تا حقسز شكوالر جنابِ حقّه گيتمه‌سين. چونكه ئولومده‌كى حكمت و رحمت و گوزللك و مصلحت جهتنى هركس گوره‌مز. ظاهره باقوب إعتراض ايدر، شكوايه باشلار. ايشته بو حقسز شكوالر رحيمِ مطلقه گيتمه‌مك حكمتيله عزرائيل عليه السلام پرده اولمش

عينًا بونڭ گبى بتون مَلكلرڭ، بلكه بتون أسبابِ ظاهريه‌نڭ وظيفه‌لرى، عزّتِ ربوبيتڭ پرده‌لريدر. تا گوزللكلرى گورونمه‌ين و حكمتلرى بيلينمه‌ين شيلرده قدرتِ إلٰهيه‌نڭ عزّتى و قدسيتى و رحمتنڭ إحاطه‌سى محافظه ايديلسين، إعتراضه هدف اولماسين و خسيس و أهمّيتسز و مرحمتسز شيلر ايله قدرتڭ مباشرتى (نظرِ ظاهريده) گورونمسين. يوقسه هيچ بر سببڭ حقيقى تأثيرى و ايجاده هيچ قابليتى اولماديغنى، هر شيده توحيد سكّه‌لرى قطعى گوسترديگنى، رسالۀِ النور حدسز دليللريله إثبات ايتمش. خلق ايتمك، ايجاد ايتمك اوڭا مخصوصدر. أسباب، يالڭز بر پرده‌در. ملائكه گبى ذى‌شعور اولانلرڭ، يالڭز جزءِ إختياريله جزئى، ايجادسز، كسب دينيلن بر نوع خدمتِ فطريه و عملى بر نوع عبوديتدن باشقه أللرنده يوقدر