رسالۀِ نورڭ قيمتدار معلّمى حافظ محمدڭ قارداشى على گولڭ سلامنى آلدم. بن هم اوڭا، هم بتون همشهريلرينه و صاوه‌نڭ بتون أحيا و أمواتنه بيڭلر سلام و دعا ايدرم

سزڭ ثبات و متانتڭز، ماصونلرڭ و منافقلرڭ بتون پلانلرينى عقيم بيراقييور

أوت قارداشلرم، صاقلامغه لزوم يوق. او زنديقلر، رسالۀِ نورى و شاكردلرينى طريقته و بِالخاصّه نقشى طريقتنه قياس ايدوب، او أهلِ طريقتى مغلوب ايتدكلرى پلانلر ايله بزلرى چوروتمك و طاغيتمق فكريله بو هجومى ياپديلر

أوّلا: اوركوتمك و قورقوتمق و او مسلگڭ سوءِ إستعمالاتنى گوسترمك

و ثانيًا: او مسلگڭ أركانلرينڭ و منتسبيننڭ قصوراتلرينى تشهير ايتمك

و ثالثًا: مادّيون فلسفه‌سنڭ و مدنيتنڭ جاذبه‌دار سفاهت و اويوتوجى لذّتلى زهرلريله إفساد ايتمك ايله مابيْنلرنده تساندى قيرمق و استادلرينى إهانتلرله چوروتمك و مسلكلرينى فنّڭ، فلسفه‌نڭ بعض دستورلريله نظرلرندن سقوط ايتديرمكدر كه؛ نقشيلره و أهلِ طريقته قارشى إستعمال ايتدكلرى عين سلاح ايله بزلره هجوم ايتديلر، فقط آلدانديلر. چونكه رسالۀِ نورڭ مسلكِ أساسى؛ إخلاصِ تام و تركِ أنانيت و زحمتلرده رحمتى و ألملرده باقى لذّتلرى حسّ ايدوب آرامق و فانى عينِ لذّتِ سفيهانه‌ده أليم ألملرى گوسترمك و ايمانڭ بو دنياده دخى حدسز لذّتلره مدار اولماسنى و هيچ بر فلسفه‌نڭ ألى يتيشمديگى نقطه‌لرى و حقيقتلرى درس ويرمك اولديغندن، اونلرڭ پلانلرينى إن شاء اﷲ تام عقيم بيراقه‌جق و مسلكِ رسالۀِ نور ايسه طريقتلره قياس ايديلمز دييه اونلرى صوصديره‌جق