شعاعلر | اون اوچنجى شعاع | 547
(489-558)
بِاسْمِهِ سُبْحَانَهُ

بِسْمِ اﷲِ الرَّحْمٰنِ الرَّحِيمِ

يَا مَعْشَرَ الْجِنِّ وَاْلاِنْسِ اَلَمْ يَاْتِكُمْ رُسُلٌ مِنْكُمْ

آيتِ جليله‌لرى موجبنجه جنلردن ده پيغمبر گلديگى بيلديريلييورسه ده، بو خصوصده‌كى مشكلڭ حلّى ايچون واقع سؤاله، استاديمزڭ ويرديگى جوابدر


عزيز قارداشم


حقيقةً سنڭ بو سؤالنڭ چوق أهمّيتى وار. فقط رسالۀِ نورڭ أڭ أهمّيتلى وظيفه‌سى، بشرى ضلالتدن و كفرِ مطلقدن قورتارمق اولماسندن، بو چشيد مسئله‌لره صيره گلمييور، اونلردن بحث آچمييور. سلفِ صالحين دخى چوق بحث ايتمه‌مشلر. چونكه اويله غيبى و گورونمه‌ين ايشلرده سوءِ إستعمال دوشر. هم شارلاتانلر، خودفروشلقلرينه بر وسيله ياپابيليرلر. ناصلكه شيمدى إسپرتيزمه‌جيلر ”جنلر ايله مخابره“ ناميله شارلاتانلق ياپييورلر؛ دينڭ ضررينه آلَت ايدرلر دييه چوقجه مدارِ بحث ايديلمز. هم خاتم الأنبيادن صوڭره، جنلرده پيغمبر گلمه‌مش. هم رسالۀِ نور بو زمانده بر طاعونِ بشرى اولان مادّيونلق فكرينى إبطال ايتمك ايچون جنّّى و روحانيلرڭ وجودلرينى قطعى حجّتلر ايله إثبات ايتمگه چاليشمش، بو مسئله‌يه اوچنجى درجه‌ده باقمش، تفصيلنى باشقه‌لره بيراقمش. بلكه إن شاء اﷲ رسالۀِ نورڭ بر شاكردى، سورۀِ رحمانى تفسير ايدوب بو مسئله‌يى ده حلّ ايدر

سس يوق

شعاعلر