{لِكُلِّ مُصِيبَةٍ اِنَّا ِﷲِ وَاِنَّا اِلَيْهِ رَاجِعُونَ} حقيقةً حافظ على، حافظ محمد و محمد زهدينڭ وفاتلرى؛ دگل يالڭز بزه و إسپارطه‌يه، بلكه بو مملكته و عالمِ إسلامه بيوك بر ضايعاتدر. فقط شيمدى‌يه قدر بر جلوۀِ عنايت اولارق، رسالۀِ نورڭ بر شاكردى ضايع اولديغى زمان، درعقب ايكى اوچ دانه او سيستمده ميدانه چيقديغندن، قوّتله اميدوارز كه، باشقه شكلده او قهرمانلرڭ وظيفه‌لرينى گوره‌جك، اُميد ايتديگمزدن جدّى شاكردلر چيقارلر، گورورلر. ذاتًا او اوچ مبارك مرحوم ذاتلر، آز بر زمانده، يوز سنه‌لك وظيفۀِ ايمانيه‌يى گورديلر. جنابِ أرحم الراحمين، اونلرڭ يازدقلرى و نشر ايتدكلرى و اوقودقلرى حروفِ نوريه عددنجه اونلره رحمتلر أيله‌سين، آمين

بنم طرفمدن او حافظ محمدڭ أقرباسنى و مبارك كوينى تعزيه ايديڭز. بن ده اونى حافظ على و محمد زهدى‌يه آرقداش ايدوب، استادلريمڭ أقطاب قسمنڭ إسملرى ايچنده او اوچينڭ إسملرينى داخل ايدوب، حافظ عاكفى دخى عاصم و لطفى‌يه آرقداش ايتدم