”بو گوزيمز اوڭنده و بزى بكله‌ين ئولومڭ إعدامِ أبديسندن و قارشيمزده قپوسنى آچان و بزى جبرِ قطعى ايله چاغيران قبرڭ دائمى قراڭلق حپسِ منفردندن قورتولمغه چاليشييورز. هم سزڭ ده او دهشتلى و چاره‌سز مصيبتدن قورتولماڭزه يارديم ايدييورز. سزڭ نظريڭزده أڭ بيوك بر مسئلۀِ دنيويه و سياسيه، بزم نظريمزده و حقيقت جهتنده قيمتى پك آزدر و بِالفعل وظيفه‌دار اولميانلره مالايعنى و أهمّيتسزدر و قيمتى يوقدر. فقط بزم إشتغال ايتديگمز وظيفۀِ ضروريۀِ إنسانيه ايسه، هركسه هر زمان جدّى علاقه‌سى وار. بو وظيفه‌‌مزى بگنمه‌ينلر و قالديرانلر، ئولومى قالديرملى و قبرى قپاملى

ايكنجى و اوچنجى نقطه‌لر شيمديلك گرى قالدى

رسالۀِ نورڭ كرامتلرندندر كه؛ استاديمز حضرتلرى: ”أى ملحدلر و أى زنديقلر! رسالۀِ نوره ايليشمه‌يڭز! رسالۀِ نور، آفاتڭ دفعنه صدقه گبى وسيله اولماسندن، اوڭا قارشى اولان هجوم و اونڭ تعطيلى، آفاته قارشى اولان مدافعه‌سنى ضعيفلشديرر. أگر ايليشيرسه‌ڭز، ياقيندن بكله‌ين بلالر، سيل گبى اوستڭزه ياغاجقدر.“ دييه، اون سنه‌در كرّاتله سويله‌يوردى. بو خصوصده شاهد اولديغمز فلاكتلر پك چوقدر. درت سنه‌دن بَرى رسالۀِ نوره و شاكردلرينه هر نه وقت ايليشيلمش ايسه؛ بر فلاكت، بر مصيبت تعقيب ايتمش و رسالۀِ نورڭ أهمّيتنى و آفاتڭ دفعنه وسيله اولديغنى گوسترمشدر. ايشته استاديمز بديع الزمانڭ رسالۀِ نور ايله خبر ويرديگى يوزلر حادثات ايچنده فلاكتلر زلزله أليله طوغريلغنى إمضا ايده‌رك گلن درت فلاكت، رسالۀِ نورڭ بر وسيلۀِ دفعِ بلا اولديغنى گوستردى. جنابِ حق، بزه و رسالۀِ نوره تعرّض ايدنلرڭ قلبلرينه ايمان و باشلرينه حقيقتى گوره‌جك عقل و گوز إحسان ايتسين؛ بزى بو زندانلردن، اونلرى ده بو فلاكتلردن قورتارسين، آمين