عزيز، صدّيق قارداشلرم

بزه إخبار ايدنه و يازانه ضرر گلمه‌مك ايچون، شيمديلك أهلِ وقوفڭ إتّفاقيله قرارلرينى سزه گوندرميه‌جگم. بو صوڭ أهلِ وقوف، بتون قوّتيله بزى قورتارمق و أهلِ ضلالت و بدعياتڭ شرّندن محافظه ايتمك ايچون چاليشمشلر، بزه إسناد ايديلن بتون صوچلردن تبرئه ايدييورلر. و رسالۀِ نوردن تام درس آلدقلرينى إحساس ايدوب، رسالۀِ نورڭ علمى و ايمانى قسمنڭ أكثريتِ مطلقه ايله واقفانه يازيلديغنى و سعيد ايسه هم صميمى، هم جدّى قناعتلرينى بيان ايده‌رك اونده‌كى قوّت و إقتدار؛ إسناد ايديلديگى گبى طريقت ايجادى ويا جمعيت قورمق ويا حكومت ايله مبارزه ايتمك دگلدر، بلكه يالڭز قرآنڭ حقيقتلرينى محتاجلره بيلديرمك قوّت و إقتداريدر دييه متّفقًا قرار ويرمشلر