رسالۀِ نوره قارشى گيزلى دشمنلريمزدن بعض زنديقلرڭ شيطنتيله چوريلن پلانلر و هجوملر إن شاء اﷲ بوزولاجقلر، اونڭ شاكردلرى باشقه‌لره قياس ايديلمز، طاغيتديريلماز، واز گچيريلمز، جنابِ حقّڭ عنايتيله مغلوب ايديلمزلر. أگر مادّى مدافعه‌دن قرآن منع ايتمسه ايدى، بو ملّتڭ جان طمارى حكمنده عمومڭ توجّهنى قزانان و هر طرفده بولونان او شاكردلر، شيخ سعيد و منمن حادثه‌لرى گبى جزئى و نتيجه‌سز حادثه‌لرله بولاشمازلر. اﷲ ايتمه‌سين، أگر مجبوريتِ قطعيه درجه‌سنده اونلره ظلم ايديلسه و رسالۀِ نوره هجوم ايديلسه، ألبته حكومتى إغفال ايدن زنديقلر و منافقلر بيڭ درجه پشيمان اولاجقلر

الحاصل؛ مادام بز أهلِ دنيانڭ دنيالرينه ايليشمييورز، اونلر ده بزم آخرتمزه و ايمانى خدمتمزه ايليشمه‌سينلر

(أسكيشهر محكمه‌سنده گيزلى قالمش و رسمًا ضبطه گچمه‌مش و مدافعاتمده دخى يازيلمامش بر أسكى خاطره‌يى و لطيف بر قصّۀِ مدافعه‌يى بيان ايدييورم

اوراده بندن صورديلر كه: جمهوريت حقّنده فكرڭ نه‌در؟

بن ده ديدم: ياشلى محكمه رئيسندن باشقه داها سز دنيايه گلمه‌دن، بن ديندار بر جمهوريتجى اولديغمى ألڭزده‌كى تاريخچۀِ حياتم إثبات ايدر. خلاصه‌سى شودر كه: او زمان شيمديكى گبى، خالى بر تربه قبّه‌سنده إنزواده ايدم، بڭا چوربا گلييوردى. بن ده دانه‌لرينى قارينجه‌لره ويرييوردم، أكمگمى اونڭ صويى ايله يردم. بندن صورديلر، بن ديدم: بو قارينجه و آرى ملّتلرى جمهوريتجيدرلر. جمهوريت‌پرورلكلرينه حرمةً دانه‌لرى قارينجه‌لره ويرييورم