صوڭره ديديلر: سن سلفِ صالحينه مخالفت ايدييورسڭ؟

جوابًا دييوردم: خلفاءِ راشدين هم خليفه هم رئيسِ جمهور ايديلر. صدّيقِ أكبر (رض) عشرۀِ مبشّره‌يه و صحابۀِ كرامه ألبته رئيسِ جمهور حكمنده ايدى. فقط معناسز إسم و رسم دگل، بلكه حقيقتِ عدالتى و حرّيتِ شرعيه‌يى طاشييان معناىِ ديندار جمهوريتڭ رئيسلرى ايديلر

ايشته أى مدّعى‌عمومى و محكمه أعضالرى! أللى سنه‌دن بَرى بنده اولان بر فكرڭ عكسيله، بنى إتهام ايدييورسڭز. أگر لائك جمهوريت صورييورسه‌ڭز، بن بيلييورم كه؛ لائك معناسى، بى‌طرف قالمق، يعنى حرّيتِ وجدان دستوريله، دينسزلره و سفاهتجيلره ايليشمديگى گبى ديندارلره و تقواجيلره ده ايليشمز بر حكومت تلقّى ايدرم. يگرمى بش سنه‌در حياتِ سياسيه و إجتماعيه‌دن چكيلمشم. حكومتِ جمهوريه نه حال كسب ايتديگنى بيلمييورم. اَلْعِيَاذُ بِاﷲ، أگر دينسزلك حسابنه، ايماننه و آخرتنه چاليشانلرى مسئول ايده‌جك قانونلرى ياپان و قبول ايدن بر دهشتلى شكله گيرمش ايسه، بونى سزه بِلا پروا إعلان و إخطار ايدرم كه: بيڭ جانم اولسه، ايمانه و آخرتمه فدا ايتمگه حاضرم. نه ياپارسه‌ڭز ياپيڭز! بنم صوڭ سوزم {حَسْبُنَا اﷲُ وَنِعْمَ الْوَكِيلُ} اولارق سزڭ بنى إعدام و آغير جزا ايله ظلمًا محكوم ايتمه‌ڭزه مقابل ديرم: بن رسالۀِ نورڭ كشفِ قطعيسيله إعدام اولمايورم، بلكه ترخيص ايديلوب، نور و سعادت عالمنه گيدييورم. و سزى، أى گيزلى دشمنلريمز و ضلالت حسابنه بزى أزن بدبختلر! إعدامِ أبدى ايله و دائمى حپسِ منفرد ايله محكوم بيلديگمدن و گورديگمدن تماميله إنتقاممى سزدن آلارق كمالِ راحتِ قلب ايله تسليمِ روح ايتمگه حاضرم! اونلره ديمشدم

يدنجى أساس: آفيون محكمه‌سى باشقه يرلرده‌كى سطحى تحقيقاته بناءً بزه بر جمعيتِ سياسيه نقطه‌سنده باقمش. بوڭا جوابمز