مادام كيفيت بويله‌در.. بن ده بوراده‌كى محكمه‌يه دگل، بلكه او إنصافسزلره ديرم: بن، سزڭ بڭا ويره‌جگڭز أڭ آغير جزاڭزه ده بش پاره ويرمم و هيچ أهمّيتى يوق. چونكه بن قبر قپوسنده، يتمش بش ياشنده‌يم. بويله مظلوم و معصوم بر ايكى سنه حياتى، شهادت مرتبه‌سيله دگيشديرمك، بنم ايچون بيوك سعادتدر. رسالۀِ نورڭ بيڭلر حجّتلريله قطعى ايمانم وار كه؛ ئولوم بزم ايچون بر ترخيص تذكره‌سيدر. أگر ظاهرى إعدام ده اولسه، بزم ايچون بر ساعت زحمت، أبدى بر سعادتڭ و رحمتڭ آناختارى اولور. فقط سز أى گيزلى دشمنلر و زندقه حسابنه عدليه‌يى شاشيرتان و حكومتى بزمله سببسز مشغول ايدن إنصافسزلر! قطعى بيليڭز و تيتره‌يڭز كه؛ سز إعدامِ أبدى ايله و أبدى حپسِ منفرد ايله محكوم اولويورسڭز. إنتقاممز سزدن پك چوق مضاعف بر صورتده آلينييور گورويورز. حتّى سزه آجييورز. أوت بو شهرى يوز دفعه مزارستانه بوشالتان ئولوم حقيقتنڭ ألبته حياتدن زياده بر ايستديگى وار. و اونڭ إعدامندن قورتولمق چاره‌سى، إنسانلرڭ هر مسئله‌سنڭ فوقنده أڭ بيوك و أڭ أهمّيتلى و أڭ لزوملى بر إحتياجِ ضروريسى و قطعيسيدر. عجبا بو چاره‌يى كندينه بولان رسالۀِ نور شاكردلرينى و او چاره‌يى بيڭلر حجّتلر ايله بولديران رسالۀِ نورى، عادى بهانه‌لر ايله إتهام ايدنلر نه قدر كنديلرى حقيقت و عدالت نظرنده متّهم اولويور، ديوانه‌لر ده آڭلار

بو إنصافسزلرى آلداتان و هيچ مناسبتى اولميان بر سياسى جمعيت وهمنى ويرن اوچ مادّه‌در

برنجيسى: أسكيدن بَرى بنم طلبه‌لرم بنم ايله قارداش گبى شدّتلى علاقه‌دار اولمالرى، بر جمعيت وهمنى ويرمش

ايكنجيسى: رسالۀِ نورڭ بعض شاكردلرى (هر يرده بولونان و جمهوريت قانونلرى مساعده ايدن و ايليشمه‌ين) جماعتِ إسلاميه هيئتلرى گبى حركت ايتمه‌لرندن بر جمعيت ظن ايديلمش. حالبوكه او محدود اوچ درت شاكردڭ نيّتلرى جمعيت ممعيت دگل، بلكه صِرف خدمتِ ايمانيه‌ده خالص بر قارداشلق و اُخروى بر تسانددر