اوچنجيسى: او إنصافسزلر كنديلرينى ضلالت و دنياپرستلكده بيلدكلرندن و حكومتڭ بعض قانونلرينى كنديلرينه مساعد بولدقلرندن فكرًا دييورلر كه: ”هر حالده سعيد و آرقداشلرى بزلره و حكومتڭ، بزم مدنيجه نامشروع هوساتمزه مساعد قانونلرينه مخالفدرلر. اويله ايسه، مخالف بر جمعيتِ سياسيه‌درلر

بن ده ديرم: هَىْ بدبختلر! أگر دنيا أبدى اولسيدى و إنسان ايچنده دائمى قالسه ايدى و إنسانى وظيفه‌لر يالڭز سياست بولونسه ايدى، بلكه بو إفتراڭزده بر معنا بولونابيليردى. هم أگر بن سياست ايله ايشه گيرسه ايدم، يوز رساله‌لرده اون جمله دگل، بلكه بيڭ جمله‌يى سياست‌وارى، مبارزه‌كارانه بولاجقديڭز. هم فرضِ محال اولارق؛ أگر بز دخى سزڭ گبى بتون قوّتمزله دنيا مقصدلرينه و كيفلرينه و سياستلرينه چاليشييورز، دييه (كه؛ شيطان ده بونى اينانديرمغه چاليشه‌مييور و كيمسه‌يه قبول ايتديره‌مز) هايدى بويله ده اولسه، مادام بو يگرمى سنه‌ده هيچ بر وقوعاتمز گوستريلمييور. حكومت أله باقار، قلبه باقماز و هر بر حكومتده شدّتلى مخالفلر بولونور. ألبته عدليه قانونى ايله بزلرى مسئول ايتمزسڭز. صوڭ سوزم: {حَسْبِىَ اﷲُ لاَ اِلٰهَ اِلاَّ هُوَ عَلَيْهِ تَوَكَّلْتُ وَهُوَ رَبُّ الْعَرْشِ الْعَظِيمِ} در

سعيد النورسى