آفيون محكمه‌سنڭ بزى إتهام ايتمه‌سنه قارشى إعتراضنامه‌نڭ تتمّه‌سيدر

(بو إعتراضمده مخاطبم آفيون مدّعيسى و محكمه‌سى دگل، بلكه باشقه يرلرده‌كى مدّعى‌عموميلرڭ و مخبر و تحرّيجيلرڭ ياڭليش و ناقص ضبطنامه‌لريله بوراده و صورغو دائره‌سنده‌كى عجيب وضعيتى عليهمزه چويرن غرضكار و وهّام مأمورلردر

أوّلاً: أصل و فصلى اولميان و خاطريمه گلمه‌ين بر سياسى جمعيت نامنى معصوم و سياستله هيچ علاقه‌لرى اولميان رسالۀِ نور طلبه‌لرينه طاقوب و او دائره ايچنه گيرن و ايمان و آخرتندن باشقه بر مقصدلرى بولونميان بيچاره‌لرى او جمعيتڭ ناشرى ويا فعّال بر ركنى ويا منسوبى ويا رسالۀِ نورى اوقومش و اوقوتمش ويا يازمش دييه صوچلى صايوب محكمه‌يه ويرمك نه قدر عدالتڭ ماهيتندن اوزاق اولديغنڭ قطعى بر حجّتى شودر كه: قرآن عليهنده يازيلان، دوقتور دوزينڭ و سائر زنديقلرڭ او مضر أثرلرينى اوقويانلر، حرّيتِ فكر و حرّيتِ علميه دستوريله صوچلى صاييلمديغى حالده؛ حقيقتِ قرآنيه‌يى و ايمانيه‌يى اوگرنمگه غايت محتاج و مشتاق اولانلره گونش گبى بيلديرن رسالۀِ نورى اوقومق و يازمق بر صوچ صاييلمش. و هم يوز رساله ايچنده ياڭليش معنا ويريلمه‌مك ايچون، محكمه‌لرڭ تشهيرلرندن أوّل محرم طوتديغمز ايكى اوچ رساله‌ده يالڭز بر قاچ جمله‌لرينى بهانه گوستروب إتهام ايتمش. حالبوكه او رساله‌لردن برى مستثنا أسكيشهر محكمه‌سى تدقيق ايتمش، ايجابنه باقمش، يالڭز بر تك تستّر رساله‌سنڭ بر ايكى مسئله‌سنه ايليشمش و مستثناسنڭ هم إستدعامده و هم إعتراضنامه‌مده غايت قطعى جوابى ويريلديگى و ”ألمزده نور وار، سياست طوپوزى يوق.“ دييه أسكيشهر محكمه‌سنده يگرمى وجهله قطعى إثبات ايديلديگى و دڭزلى محكمه‌سى بِلا إستثنا بتون رساله‌لرى تدقيق ايتمش هيچ بريسنه ايليشمديگى حالده، او إنصافسز مدّعيلر، او ايكى اوچ رساله‌نڭ اوچ درت جمله‌لرينى بتون رسالۀِ نوره تشميل ايدوب، حتّى درت يوز صحيفه‌لى ذو الفقارى ايكى صحيفه ايچون مصادره ايدر گبى، رسالۀِ نورى اوقويان و يازانى صوچلى و بنى ده حكومت ايله مبارزه ايدر دييه إتهام ايتمشلر