يدنجيسى: بو صيره‌ده داخلده او قدر داخلى، خارجى هيجانلى پارتى جريانلرى واركن و بوندن تام إستفاده ايتمك، يعنى محدود بر قاچ آرقداشنه بدل چوق ديپلوماتلرى كنديسنه طرفدار قزانمق ايچون زمين حاضر ايكن، صِرف سياسته قاريشمه‌مق و إخلاصنه ضرر ويرمه‌مك و حكومتڭ نظرينى كندينه جلب ايتمه‌مك و دنيا ايله مشغول اولمامق ايچون، بتون آرقداشلرينه يازوب كه: ”صاقين جريانلره قاپيلمايڭز، سياسته گيرمه‌يڭز، آسايشه طوقونمايڭز!“ ديديگى و ايكى جريان بو چكينمه‌سندن اوڭا ضرر ويردكلرى؛ أسكيسى أوهامندن، يڭيسى ده ”بزه يارديم ايتمييور“ دييه اوڭا چوق صيقنتى ويردكلرى حالده، أهلِ دنيانڭ دنيالرينه هيچ قاريشمايوب كندى آخرتى ايله مشغول اولان و مملكتنده نورس قريه‌سنده ئوز قارداشنه يگرمى ايكى سنه ظرفنده بر تك مكتوب يازميان و او ولايتلرده‌كى دوستلرينه يگرمى سنه‌ده اون مكتوب يازميان بر بيچاره‌يه، اونڭ آخرت مشغوليتنه بو قدر ايليشمگه هانگى قانون مساعده ايدييور؟

وطنه و ملّته و أخلاقه چوق ضررلى اولان دينسزلرڭ كتابلرينڭ إنتشارينه و قومونيستلرڭ نشرياتنه سربستيت قانونى ايله ايليشيلمديگى حالده، اوچ محكمه مدارِ مسئوليت اولاجق ايچنده هيچ بر مادّه‌يى بولميان و ملّت و وطنڭ حياتِ اجتماعيه‌سنى و أخلاقنى و آسايشنى تأمينه يگرمى سنه‌دن بَرى چاليشان و بو ملّتڭ حقيقى بر نقطۀِ إستنادى اولان عالمِ إسلامڭ اخوّتنى و بو ملّته دوستلغنى إعاده‌يه و او دوستلغى تقويه‌سنه تأثيرلى بر صورتده چابالايان و ديانت رياستنڭ علماسى تنقيد نيّتيله داخليه وكيلنڭ أمريله اوچ آى تدقيقدن صوڭره، تنقيد ايتميه‌رك تام قيمتنى تقدير ايدوب ”قيمتدار أثر“ دييه ديانت كتبخانه‌سنه قونيلان ذو الفقار و عصاىِ موسى گبى (كه قبرِ پيغمبرى (عليه الصلاة والسلام) اوزرنده علامتِ مقبوليت اولارق عصاىِ موسى مجموعه‌سنى حاجيلر گوردكلرى حالده) نور أجزالرينى أوراقِ مضرّه گبى طوپلايوب محكمه ألنه ويرمك؛ عجبا هيچ بر قانون، هيچ بر وجدان، هيچ بر إنصاف بوڭا مساعده ايدر مى