خطا صواب جدولنڭ ذيليدر

٨٢. گيزلى جمعيتى وار و أميرطاغنده اونڭله مشغول اولمش

ج - بو إتهامى هيچ بر جهتله إثبات ايديله‌ميه‌جگنه و إفترا اولديغنه قطعى دليلى؛ شدّتلى ترصّد و تام بر إنزوا و دنيا حادثاتنه هيچ قولاق ويرميه‌جك درجه‌ده بر تجرّد و إختيارلق و ضعفيت و خسته‌لق ايچنده بولونماسيدر. هفته‌ده يالڭز بر تك مكتوب، بر تك يره گوندرمكدن باشقه هيچ مخابره ايتمه‌ين و تأليفى دخى بيراقان و سربستيت ويريلديگى حالده، حدسز دوستلرى و اونى ديڭله‌يه‌جك همشهريلرى بولونان مملكتنه گيتمه‌ين و خدمتى ايچون بر ايكى ترزى چيراغندن باشقه كيمسه‌يى ايسته‌مه‌ين و زيارت ايچون گلنلردن قرقدن بريسنى بر قاچ دقيقه‌دن زياده ياننده طورديرميان بر غريب و قبر قپوسنده و برائت ايتمش و اوتوز سنه‌دن بَرى سياستى ترك ايتمش بر بيچاره حقّنده، بو گيزلى جمعيت إسنادينڭ إتهامى اويله بيوك و إنصافسزجه و ظالمانه بر خطادر كه، اوڭا تماس ايدنلردن ذرّه قدر عقلى بولونان، بو يالاندر و أصلسزدر دير.

٨٣، ٨٤، ٨٥. إدّعاجى ديمش: سعيدڭ گيزلى دشمنى يوق. و اونى زهرله‌ين يوق. و زنديق نامنى ويرديگى و قرق سنه‌دن بَرى سعيد اونلرڭ أهلِ ايمان حقّنده‌كى إفساداتنه قارشى قرآنڭ حقيقتلرى ايله مقابله ايتديگى بر قوميته يوقدر. بلكه اونى تضييق ايدن بر قسم مأمورلره زنديق و منافق دييور

ج - إدّعاجينڭ بو إتهامى، هم قاچ وجهله خطا و يالان هم بيچاره و آلدانمش و وظيفه إعتباريله سعيدى حپس ويا تعذيب ايتمش بر قسم مسلمان و أهلِ ايمان مأمورلره، او منافق و زنديق تعبيرينى ويرمك بيوك بر جنايتدر. و بو ديندار ملّتى بر تحقير و إتهامدر كه، سعيد مكرّر ديمش: او وظيفه‌پرور مسلمانلر نورلره ضرر ويرمه‌ين و إستفاده ايدن عدليه مأمورلرى بنى إعدامله محكوم ايتسه‌لر، حقّمى اونلره حلال ايدرم دييوب، ممكن اولديغى قدر مصالحه‌كارانه اونلرڭ وظيفه‌لرينه طوقونه‌جق حركاتدن چكينن بر منزوى و غريب آدم حقّنده بو إتهام بيوك بر گناه و بر إفترادر. حالبوكه سعيدى بيلنلر بيليرلر كه، ممكن اولديغى قدر تكفيردن چكينير. حتّى صريح كفرى بر آدمدن گورسه ده، ينه تأويله چاليشير. اونى تكفير ايتمز. هر وقت حسنِ ظن ايله حركت ايتديگى حالده اوڭا بو إتهامى ياپان ألبته كنديسى او إتهام ايله تام متّهمدر