آفيون محكمه‌سندن حقّمزده صادر اولان حقسز حكمڭ تمييزًا بوزولماسى اوزرينه ياپيلان دوروشمامزده بنى ينه قونوشديرمديلر. حقّمزده اوچنجى بر شدّتلى إدّعانامه‌يى بزه ديڭلتديرديلر. هم يانمه كيمسه‌يى بيراقمديلر كه، گلسين يازيله بڭا يارديم ايتسين. يازيم نقصان اولمقله برابر خسته حالمله برابر يازديغم بو شكوامى بو زمانده حقّمده ايكى دفعه تام عدالت ايدن مقامڭزه بر لايحۀِ تمييزم اولارق تقديم ايدييورم

(حشرده‌كى محكمۀِ كبرايه بر عرضحالدر و درگاهِ إلٰهى‌يه بر شكوادر. و بو زمانده محكمۀِ تمييز و إستقبالده‌كى نسلِ آتى و دار الفنونلرڭ منوّر معلّم و طلبه‌لرى دخى ديڭله‌سينلر. ايشته بو يگرمى اوچ سنه‌ده يوزر إشكنجه‌لى مصيبتلردن (اون دانه‌سنى) عادل حاكمِ ذو الجلالڭ درگاهِ عدالتنه مشتكيانه تقديم ايدييورم

برنجيسى: بن قصورلرمله برابر بو ملّتڭ سعادتنه و ايماننڭ قورتولمسنه حياتمى وقف ايتدم. و ميليونلرله قهرمان باشلرڭ فدا اولدقلرى بر حقيقته، يعنى قرآن حقيقتنه بنم باشم دخى فدا اولسون دييه بتون قوّتمله رسالۀِ نورله چاليشدم. بتون ظالمانه تعذيبلره قارشى توفيقِ إلٰهى ايله طاياندم، گرى چكيلمه‌دم

أزجمله: بو آفيون حپسمده و محكمه‌مده باشمه گلن چوق غدّارانه معامله‌لردن بريسى: اوچ دفعه و هر دفعه‌سنده ايكى ساعته ياقين عليهمزده غرضكارانه و مفتريانه إتهامنامه‌لرينى، بڭا و عدالتدن تسلّى بكله‌ين معصوم نور طلبه‌لرينه جبرًا ديڭلتديردكلرى حالده، چوق رجا ايتدم بش اون دقيقه بڭا مساعده ايديڭز كه، حقوقمزى مدافعه ايده‌يم. بر ايكى دقيقه‌دن فضله إذن ويرمديلر