ايكنجيسى: بنى جزالانديرمغه گوستردكلرى بر سبب: بنم تستّر، إرثيت، ذكر اﷲ، تعدّدِ زوجات حقّنده قرآنڭ غايت صريح آيتلرينه، مدنيتڭ إعتراضلرينه قارشى اونلرى صوصديره‌جق تفسيرمدر

اون بش سنه أوّل أسكيشهر محكمه‌سنه و آنقره‌يه محكمۀِ تمييزه و تصحيحه يازديغم (و عليهمده‌كى قرارنامه‌ده يازدقلرى) بو گلن فقره‌يى: هم حشرده محكمۀِ كبرايه بر شكوا، هم إستقبالده منوّر أهلِ معارف هيئتنه بر ايقاظ، هم ايكى دفعه برائتمزده إنصاف و عدالتله فرياديمزى ديڭله‌ين محكمۀِ تمييزه الحجة الزهرا ايله برابر بر نوع لايحۀِ تمييز، هم بنى قونوشديرمايان و سكسان خطاسنى إثبات ايتديگمز غرضكارانه إتهامنامه ايله بنى ايكى سنه آغير جزا و تجريدِ مطلق و ايكى سنه باشقه يره نفى و گوز نظارتى حپسيله محكوم ايدن هيئته عينًا او فقره‌يى تكرار ايدييورم

ايشته بن ده عدليه‌نڭ محكمه‌سنه ديرم كه: بيڭ اوچيوز أللى سنه‌ده و هر عصرده اوچ يوز أللى ميليون مسلمانلرڭ حياتِ إجتماعيه‌سنده قدسى و حقيقى بر دستورِ إلٰهى‌يى اوچ يوز أللى بيڭ تفسيرڭ تصديقلرينه و إتّفاقلرينه إستنادًا و بيڭ اوچيوز سنه‌ده گچمش أجداديمزڭ إعتقادلرينه إقتداءً تفسير ايدن بر آدمى محكوم ايدن حقسز بر قرارى، ألبته روىِ زمينده عدالت وارسه، او قرارى ردّ و بو حكمى نقض ايده‌جكدر دييه باغيرييورم. بو عصرڭ صاغير قولاقلرى دخى ايشيتسين! عجبا بو زمانڭ بعض إلجاآتنڭ إقتضاسيله موقّةً قبول ايديلن بر قسم أجنبى قانونلرينى فكرًا و علمًا قبول ايتمه‌ين و سياستى بيراقان و حياتِ إجتماعيه‌دن چكيلن بر آدمى، او آياتڭ تفسيرلريله صوچلى ياپمقله، إسلاميتى إنكار و ديندار و قهرمان بر ميليار أجداديمزه إهانت و ميليونلرله تفسيرلرى إتهام چيقماز مى