بن يگرمى آى تجريدِ مطلقده طورديريلديغم حالده يالڭز اوچ درت ساعت بر ايكى آرقداشمه إذن ويريلدى. مدافعاتمڭ يازيسنده آز بر پارچه يارديملرى اولدى. صوڭره اونلر ده منع ايديلدى. پك غدّارانه معامله‌لر ايچنده جزالانديرديلر. مدّعينڭ بيڭ دره‌دن صو طوپلامق نوعندن و ياڭليش معنا ويرمكله و إفترالر و يالان إسنادلرله غرضكارانه و اون بش صحيفه‌سنده سكسان بر خطاسنى إثبات ايتديگم عليهمزده‌كى إتهامنامه‌لرينى ديڭله‌مگه بزى مجبور ايتديلر. بنى قونوشديرمديلر. أگر قونوشديرسه‌لردى دييه‌جكدم

هم دينڭزى إنكار، هم أجداديڭزى ضلالتله تحقير ايدن و پيغمبريڭزى (ع‌ص‌م) و قرآنڭزڭ قانونلرينى ردّ ايدوب قبول ايتمه‌ين يهودى و نصرانى و مجوسيلره، خصوصًا شيمدى بولشويزم پرده‌سى آلتنده‌كى آنارشيست و مرتد و منافقلره حرّيتِ وجدان، حرّيتِ فكر بهانه‌سيله ايليشمديگڭز حالده و إنگليز گبى خرستيانلقده متعصّب، جبّار بر حكومتڭ دائرۀِ ملكنده و حاكميتنده، ميليونلرله مسلمانلر هر وقت قرآن درسيله إنگليزڭ بتون باطل عقيده‌لرينى و كفرى دستورلرينى ردّ ايتدكلرى حالده اونلره محكمه‌لريله ايليشمديگى و هر حكومتده بولونان مخالفلر علنًا فكرلرينڭ نشرنده، او حكومتلرڭ محكمه‌لرى ايليشمديگى حالده، بنم قرق سنه‌لك حياتمى و يوز اوتوز كتابمى و أڭ محرم رساله و مكتوبلريمى، هم إسپارطه حكومتى، هم دڭزلى محكمه‌سى، هم آنقره جزا محكمه‌سى، هم ديانت رياستى، هم ايكى دفعه بلكه اوچ دفعه محكمۀِ تمييز تام تدقيق ايتدكلرى و اونلرڭ أللرنده ايكى اوچ سنه رسالۀِ نورڭ محرم و غيرِ محرم بتون نسخه‌لرى قالديغى و بر كوچك جزايى ايجاب ايده‌جك بر تك مادّه‌يى گوسترمدكلرى، هم بو درجه ضعفيتم و مظلوميتم و مغلوبيتم و آغير شرائط ايله برابر ايكى يوز بيڭ حقيقى و فداكار شاكردلره وطن و ملّت و آسايش منفعتنده أڭ قوّتلى و صاغلام و حقيقتلى بر رهبر اولارق كندينى گوسترن رسالۀِ نورڭ ألڭزده‌كى مجموعه‌لرى و درت يوز صحيفه مدافعاتمز معصوميتمزى إثبات ايتدكلرى حالده، هانگى قانون ايله، هانگى وجدان ايله، هانگى مصلحت ايله، هانگى صوچ ايله بزى آغير جزا و پك آغير إهانتلر و تجريدلرله محكوم ايدييورسڭز؟ ألبته محكمۀِ كبراءِ حشرده سزدن صوريلاجق