عزيز، صدّيق قارداشلرم

أوّلا: حدسز شكر ايدرم كه: رسالۀِ نورڭ حقيقى صاحبلرى اولان مفتيلر، واعظلر، إماملر، خواجه‌لردن معنوى قهرمانلر ميدانه چيقديلر. شيمدى‌يه قدر نورڭ فداكارلرى؛ گنجلر، مكتبليلر، معلّملر ايدى. بيڭ بارك اﷲ أدهم إبراهيملر، على عثمانلر أهلِ مدرسه‌نڭ يوزلرينى آق ايتديلر، چكينگنلكلرينى جسارته چويرديلر

ثانيًا: خالصانه فعاليتلرندن و هيجانلرندن نشئت ايدن بو حادثه‌دن تأسّف ايتمه‌سينلر. چونكه دڭزلى حپسى نتيجه إعتباريله، إحتياطسز حركت ايدنلرى تبريك ايتديردى. زحمت پك آز، فائدۀِ معنويه پك چوق اولدى. إن شاء اﷲ بو اوچنجى مدرسۀِ يوسفيه، ايكنجيدن گرى قالميه‌جق

ثالثًا: مشقّت درجه‌سنده ثوابڭ زياده‌لشمه‌سى جهتنده، بو شدّتلى حاله شكر ايتملى‌يز. وظيفه‌مز اولان خدمتِ ايمانيه‌يى إخلاصله ياپمغه چاليشمالى؛ وظيفۀِ إلٰهيه اولان موفّقيت و خيرلى نتيجه‌لرى ويرمك جهتنه قاريشماملى‌يز. {خَيْرُ اْلاُمُورِ اَحْمَزُهَا} دييوب بو چلّه‌خانه‌ده‌كى صيقنتيلره صبر ايچنده شكر ايتملى‌يز. عملمزڭ مقبوليتنه بر علامت و قدسى مجاهده‌مزڭ إمتحاننده تام بر شهادتنامه آلمامزه بر أماره‌در بيلمه‌لى‌يز