عزيز، صدّيق قارداشلرم

أوّلا: بنم شخصمه ايديلن أذيت و إهانتلردن متأثّر اولمايڭز. چونكه رسالۀِ نورده بر قصور بولامييورلر، اونڭ بدلنه بنم أهمّيتسز و چوق قصورلى شخصمله اوغراشييورلر. بن بوندن ممنونم. رسالۀِ نورڭ سلامتنه و شرفنه بيڭلر شخصى ألملر، بلالر، تحقيرلر گورسه‌م؛ ينه مفتخرانه شكر ايتمك، نوردن آلديغم درسڭ مقتضاسيدر و اونڭ ايچون بڭا بو جهتده آجيمايڭز

ثانيًا: پك گنيش و شدّتلى و مرحمتسز بو تعرّض و هجوم، شيمديلك يگرميدن بره ايندى. بيڭلر خاصلر يرنده بر قاچ ذات و يوز بيڭلر علاقه‌دارلر بدلنه محدود بر قاچ يڭى قارداشلرى طوپلاديلر. ديمك عنايتِ إلٰهيه ايله پك خفيف بر صورته چوريلمش.

ثالثًا: عنايتِ ربّانيه ايله ايكى سنه عليهمزده پلان چويرن سابق والى دفع اولدى و عليهمزده پك زياده أوهاملانديريلان داخليه وكيلنڭ همشهريلگى و نسلجه جدلرى زياده ديندارلق جهتيله بو دهشتلى هجومى پك چوق خفيفلشدرديگنه قوّتلى بر إحتمال وار. اونڭ ايچون مأيوس اولمايڭز و تلاش ايتمه‌يڭز

رابعًا: پك چوق تجربه‌لرله و حادثه‌لرله قطعى قناعت ويره‌جك بر طرزده، رسالۀِ نورڭ آغلاماسيله يا زمين تيتره‌ر ويا هوا آغلار. گوزيمزله چوق گورديگمز و قسمًا محكمه‌ده دخى إثبات ايتديگمز گبى؛ تخمينمجه، بو قيش أمثالسز بر طرزده ياز گبى (بدايتده) گولمه‌سى، رسالۀِ نورڭ پرده آلتنده تكثير ماكينه‌سيله گولمه‌سنه و إنتشارينه توافقى و هر طرفده تحرّى و مصادره أنديشه‌سيله توقّفله آغلامه‌سنه، بردن بره قيش دهشتلى حدّتى و آغلاماسيله تطابقى، قوّتلى بر أماره‌در كه، حقيقتِ قرآنيه‌نڭ بو عصرده پارلاق بر معجزۀِ كبراسيدر، زمين و كائنات اونڭ ايله علاقه‌دار