عزيز، صدّيق قارداشلرم

بوگون بردن خاطره گلدى كه؛ مسئلۀِ نوريه مناسبتيله بو مدرسه‌يه قدرِ إلٰهى و قسمتڭ سَوقيله گلنلرى تعزيه يرينه تبريك أيله. چونكه أكثريتڭ هر برى يگرمى، اوتوز، بلكه يوز، بلكه بيڭ معصوم قارداشلريمزه بدل گلوب اونلرى بر درجه زحمتدن قورتارييور. هم نور ايله ايمانه خدمتڭز دوام ايتمكله برابر، هر برى آز زمانده چوق خدمت ايتمش، بعضلرى اون سنه‌ده يوز سنه‌لك ايش گورمش گبيدر. هم بو يڭى مدرسۀِ يوسفيه‌نڭ إمتحاننده بولونوب اونڭ گنيش و كلّى و قيمتدار نتيجه‌لرينه بِالفعل حصّه‌دار اولمق ايچون بو زحمتلى مجاهده‌يه گيرييورلر. و قولايجه، گورمه‌لرينه مشتاق اولدقلرى خالص، صادق قارداشلرينى گوروب طاتلى بر درس آلوب ويرييورلر. هم مادام دنيانڭ إستراحت زمانلرى دوام ايتمييور، بوش بوشنه گيدييور؛ ألبته بويله آز زحمتله چوق كار قزانانلر تبريكه لايقدرلر

قارداشلرم، بو گنيش هجوم، رسالۀِ نورڭ فتوحاتنه قارشيدر. فقط آڭلاديلر كه؛ نورلره ايليشدكجه داها زياده پارلار، درس دائره‌سى گنيشلنوب أهمّيت كسب ايدر و مغلوب اولماز. يالڭز (سِرًّا تَنَوَّرَتْ) پرده‌سى آلتنه گيرر. اونڭ ايچون پلانى دگيشديرديلر، ظاهرًا نورلره ايليشمييورلر. بز مادام عنايت آلتنده‌يز، ألبته كمالِ صبر ايچنده شكر ايتملى‌يز