باشده مدير اولارق حپسڭ هيئتِ إداره‌سنه صورةً أهمّيتسز

فقط بنجه چوق أهمّيتلى بر معروضاتم وار

يگرمى ايكى سنه تجريدِ مطلق ايچنده گچن حياتم و يتمش بش ياشنده وجوديمڭ آشيلره تحمّلى يوقدر. حتّى چوق زمان أوّل بنى آشيلاديلر، يگرمى سنه اونڭ أثرى اولارق جراحت ياپييوردى. مزمِن بر زهر حكمنه گچدى. أميرطاغنده ايكى دوقتور و آرقداشلرم بونى بيلييورلر. هم درت سنه أوّل، دڭزليده بنى ده عموم محكوملر ايچنده آشيلاديلر. هيچ بريسنه ضرر اولماديغى حالده، بنى يگرمى گون خسته أيلدى. حفظِ إلٰهى ايله، بنم ايچون تهلكه‌لى اولان خسته‌خانه‌يه گيتمگه مجبور ايديلمدم. قطعيًا وجودم آشى‌يه گلمز. هم معذرتم قوّتليدر. هم يتمش بش ياشنده غايت ضعيف اولديغمدن، اون ياشنده بر چوجغه ايديلن آشى‌يه آنجق تحمّل ايدرم. هم مادام دائما تجريدِ مطلق ايچنده‌يم، بنم باشقه‌لرله تماسم يوق. هم بر آى أوّل ايكى دوقتورى والى أميرطاغنه گوندردى، بنى تام معاينه ايتديلر، هيچ بر سارى خسته‌لق بولونمديغى، يالڭز غايت ضعفيتدن و تجريد و إختيارلقدن و قولونج خسته‌لغندن باشقه بر شى بولامديلر. ألبته بو حال، بنى قانونجه آشيلامغه مجبور ايتمز

هم بيوك بر رجام وار، بنى خسته‌خانه‌يه سَوق ايتمه‌يڭز. بتون حياتمده، خصوصًا بو يگرمى ايكى سنه تجريدِ مطلق عمرمده تحمّل ايده‌مديگم بر وضعيته، يعنى طانيمديغم خسته باقيجيلرڭ حكمى آلتنه مجبور ايتمه‌يڭز. گرچه بو صيره‌لرده قبره گيرمگى خوش گورمگه باشلامشدم. فقط إنسانيتلرينى گورديگم بو حپسڭ هيئتِ إداره‌سنڭ خاطرلرى و محبوسلرڭ تسلّيلرى ايچون شيمديلك حپسى قبره ترجيح ايتدم