عزيز، صدّيق قارداشلرم

غريب و لطيف ايكى حالمى بيان ايتمك لازم گلدى

برنجيسى: بنم تجريدِ مطلقده سزڭ گبى جانمدن زياده سَوْديگم قارداشلرمله سربست گوروشه‌مديگمده بر عنايتِ إلٰهيه و بر مصلحت بولونديغى قلبمه إخطار ايديلدى. چونكه أللى ليرايى يولده صرف ايدوب گوروشمك ايچون أميرطاغنه گله‌رك أللى دقيقه، بعض اون دقيقه، بعض هيچ گوروشمه‌دن گيدن چوق آخرت قارداشلريمز، برر بهانه ايله كنديلرينى بو مدرسۀِ يوسفيه‌يه آتاجقلردى. بنم طار وقتم و إنزوادن گلن حالتِ روحيه‌م بيراقسه، او فداكار دوستلر ايله تام صحبت ايتمگه خدمتِ نوريه مساعده ايتمزدى

ايكنجيسى: بر زمان مشهور بر علاّمه‌يى، حربڭ متعدّد جبهه‌سنده جهاده گيدنلر گورمشلر، اوڭا ديمشلر. او ده ديمش: ”بڭا ثواب قزانديرمق و درسلرمدن أهلِ ايمانه إستفاده ايتديرمك ايچون بنم شكلمده بعض أوليالر بنم يرمده ايشلر گورمشلر.“ عينًا بونڭ گبى، دڭزليده جامعلرده بنى گوردكلرى حتّى رسمًا إخبار ايديلمش و مدير و غارديانه عكس ايتمش. بعضلرى تلاش ايده‌رك، ”كيم اوڭا حپسخانه قپوسنى آچييور؟“ ديمشلر. هم بوراده دخى عينًا اويله اولويور. حالبوكه بنم چوق قصورلى، أهمّيتسز شخصيتمه پك جزئى بر خارقه إسنادينه بدل، رسالۀِ نورڭ خارقه‌لرينى إثبات ايدوب گوسترن سكّۀِ غيبى مجموعه‌سى يوز درجه، بلكه بيڭ درجه زياده نورلره إعتماد قزانديرر و مقبوليتنه إمضا باصار. خصوصًا نورڭ قهرمان طلبه‌لرى، حقيقةً خارقه حاللرى و قلملريله إمضا باصييورلر