عزيز، صدّيق قارداشلرم

بنى مراق ايتمه‌يڭز، بن سزڭله برابر بر بناده بولونديغمدن بختيارم، ممنون و مسرورم.

شيمدى وظيفه‌مز: بر مدافعه نسخه‌سى إسپارطه‌يه گيتسين. ممكن ايسه هم يڭى حروفله، هم ماكينه ايله أسكى حروف يگرمى نسخه چيقسين. حتّى اورانڭ مدّعى‌عمومينه گوستريلسين. هم بر نسخه آووقاتمزه بِالذّات ويريلسين و آيرى بر نسخه ده مديره ويروب تا اونى ده دعوا وكيلمزه او ويرسين. هم آنقره مقاماتنه يڭى حرفله برابر أسكى حرفله دڭزليده اولديغى گبى، گوندريله‌جك. ممكن ايسه، بش نسخه مقاماته حاضرلانسين. چونكه مصادره ايديلن نورلر، أسكى حرفله او مقاماته، خصوصًا ديانت رياستى هيئتنه گوندريلمش، صوڭره بورايه گلمش. هم وكيلمز أحمد بگه خبر ويريڭز كه، مدافعه‌يى ماكينه ايله يازديغى وقت صحّتنه پك چوق دقّت ايتسين. چونكه إفاده‌لرم باشقه‌سنه بڭزه‌مييور. بر حرفڭ و بعضًا بر نقطه‌نڭ ياڭليشيله بر مسئله دگيشير، معنا بوزولور. هم بورايه گلن ايكى ماكينه، سزه مساعده ويريلمزسه گرى گيتسينلر. هم تلاش ايدوب صيقيلمايڭز، مأيوس اولمايڭز. {اِنَّ مَعَ الْعُسْرِ يُسْرًا} سرّيله، عنايتِ إلٰهيه إن شاء اﷲ چابوق إمداديمزه يتيشير

عزيز، صدّيق قارداشلرم

رسالۀِ نور بنم بدلمه سزلرله گوروشور، درسه مشتاق يڭى قارداشلريمزه گوزلجه درس ويرر. نورلرله يا اوقومق ويا اوقوتمق ويا يازمق صورتنده‌كى مشغوليت؛ تجربه‌لرله قلبه فرح، روحه راحت، رزقه بركت، وجوده صحّت ويرييور. شيمدى خسرو گبى نور قهرمانى سزه إحسان ايديلدى. إن شاء اﷲ بو مدرسۀِ يوسفيه دخى، مدرسة الزهرانڭ بر مبارك درسخانه‌سى اولاجق. بن شيمدى‌يه قدر خسروى أهلِ دنيايه گوسترمييوردم، گيزلردم. فقط نشر ايديلن مجموعه‌لر، اونى أهلِ سياسته تماميله گوستردى، گيزلى بر شى قالمادى. اونڭ ايچون بن اونڭ ايكى اوچ خدمتنى خاص قارداشلريمه إظهار ايتدم. هم بن، هم او، داها گيزله‌مك دگل، لزوم ايسه عين حقيقت بيان ايديله‌جك. فقط شيمديلك قارشيمزده حقيقتى ديڭله‌يه‌جكلر ايچنده دهشتلى و تظاهر ايتمش ايكى معنّد؛ هم زندقه، هم قومونيست حسابنه (برى أميرطاغنده معلوم اولمش، برى ده بوراده) غايت دسّاسانه، عليهمزده إفترالرله مأمورلرى اوركوتمگه چاليشييورلر. اونڭ ايچون بز شيمديلك چوق إحتياط ايدوب تلاش ايتمه‌مك و عنايتِ إلٰهيه‌نڭ إمداديمزه گلمه‌سنى توكّل ايله بكله‌مك لازمدر