عزيز، صدّيق قارداشلرم

بن هم رسالۀِ نورى، هم سزلرى، هم كنديمى، خسرو و حفظى و بارطينلى سيّدڭ قيمتدار مژده‌لريله هم تبريك، هم تبشير ايدييورم. أوت بو سنه حجّه گيدنلر، مكّۀِ مكرّمه‌ده نورڭ قوّتلى مجموعه‌لرينى بيوك عالملرڭ هم عربجه، هم هندجه ترجمه و نشره چاليشمه‌لرى گبى؛ مدينۀِ منوّره‌ده دخى او درجه مقبول اولمش كه، روضۀِ مطهّره‌ده مقبرِ سعادت اوستنده قونولمش. حاجى سيّد، كندى گوزيله عصاىِ موسى مجموعه‌سنى قبرِ پيغمبرى (ع‌ص‌م) اوزرنده گورمش. ديمك مقبولِ نبوى اولمش و رضاىِ محمّدى عليه الصلاة والسلام دائره‌سنه گيرمش. هم نيّت ايتديگمز و بورادن گيدن حاجيلره ديديگمز گبى، نورلر بزم بدلمزه او مبارك مقاملرى زيارت ايتمشلر. حدسز شكر اولسون، نورڭ قهرمانلرى بو مجموعه‌لرى تصحيحلى اولارق نشر ايتمه‌لريله پك چوق فائده‌لرندن بريسى ده؛ بنى تصحيح وظيفه‌سندن و مراقندن قورتارديغى گبى، قلمله يازيلان سائر نسخه‌لره تام بر مأخذ اولمق جهتنده يوزر تصحيحجى حكمنه گچديلر. جنابِ أرحم الراحمين او مجموعه‌لرڭ هر بر حرفنه مقابل اونلرڭ دفترِ حسناتلرينه بيڭ حسنه يازديرسين. آمين، آمين، آمين

مژده‌لى و تعبيرى چيقمش لطيف بر رؤيا

بڭا خدمت ايدن على گلدى، ديدى: ”بن رؤياده گوردم كه، سن خسروله برابر پيغمبر عليه الصلاة والسلامڭ ألنى اوپدڭ.“ بردن بر مكتوب آلدم كه، خسروڭ خطّيله يازيلان عصاىِ موسى مجموعه‌سنى قبرِ محمّدى عليه الصلاة والسلام اوزرنده حاجيلر گورمشلر. ديمك بنم بدلمه پيغمبر عليه الصلاة والسلامڭ معنوى ألنى، خسرو قلمنڭ واسطه‌سيله اوپمش و رضاىِ نبويه‌يه مظهر اولمش