عزيز، صدّيق قارداشلرم، بو مدرسۀِ يوسفيه‌ده درس آرقداشلرم!

بو گلن گيجه اولان ليلۀِ برائت، بتون سنه‌ده بر قدسى چكردك حكمنده و مقدّراتِ بشريه‌نڭ پروغرامى نوعندن اولماسى جهتيله ليلۀِ قدرڭ قدسيتنده‌در. هر بر حسنه‌نڭ ليلۀِ قدرده اوتوز بيڭ اولديغى گبى، بو ليلۀِ برائتده هر بر عملِ صالحڭ و هر بر حرفِ قرآنڭ ثوابى يگرمى بيڭه چيقار. سائر وقتده اون ايسه، شهورِ ثلاثه‌ده يوزه و بيڭه چيقار. و بو قدسى ليالئِ مشهوره‌ده اون بيڭلر، يگرمى بيڭ ويا اوتوز بيڭلره چيقار. بو گيجه‌لر، أللى سنه‌لك بر عبادت حكمنه گچه‌بيلير. اونڭ ايچون ألدن گلديگى قدر قرآنله و إستغفار و صلواتله مشغول اولمق بيوك بر كاردر.

أللى سنه‌لك بر معنوى عبادت عمرينى أهلِ ايمانه قزانديره‌بيلن ليلۀِ برائتڭزى روح و جانمزله تبريك ايدرز. هر بريڭز، شركتِ معنويه سرّيله و تساندِ معنوى فيضيله قرق بيڭ لسانله تسبيح ايدن بعض مَلكلر گبى؛ هر بر خالص، مخلص نور شاكردلرينى قرق بيڭ ديل ايله إستغفار و عبادت ايتمش گبى رحمتِ إلٰهيه‌دن قناعتِ تامّه ايله اُميد ايدييورز.