رسالۀِ نور بو چشيد مسائلى حلّ ايتمش. كرويتِ أرض علماءِ إسلامجه قبول ايديلمش، دينه مخالفتى يوق. آيتده‌كى سطح ديمسى، كروى اولماديغنه دلالت ايتمييور. مجتهدلرجه ”إستقبالِ قبله“ نمازده شرط اولماسى و شرط ايسه بتون أركانده بولونماسى سرّيله، سجده و ركوعده إستقبالِ قبله لازم گلييور. بو ايسه يرڭ، زمينڭ كرويتى ايله و شرعًا قبله كعبۀِ مكرّمه‌نڭ اوستى تا عرشه قدر و آلتى فرشه قدر بر عمودِ نورانى اولماسى، كرويتله إستقبال أركانده بولونه‌بيلير.

عزيز، صدّيق قارداشلرم!

مبارك رمضانِ شريفڭزى بتون روح و جانمزله تبريك ايدييورز. جنابِ حق بو رمضانِ شريفڭ ليلۀِ قدرينى عمومڭزه بيڭ آيدن خيرلى أيله‌سين، آمين. و سكسان سنه بر عمرِ مقبول حكمنده حقّڭزده قبول أيله‌سين، آمين

ثانيًا: بايرامه قدر بوراده قالمامزڭ بزلره چوق فائده‌سى و خيرى اولديغنه قناعتم وار. شيمدى تخليه اولسه ايدك، بو مدرسۀِ يوسفيه‌ده‌كى خيرلردن محروم قالديغمز گبى، صِرف اُخروى اولان رمضانِ شريفى؛ دنيا مشغله‌لريله حضورِ معنويمزى خللدر ايده‌جكدى. {اَلْخَيْرُ فِىمَا اخْتَارَهُ اﷲُ} سرّيله إن شاء اﷲ بونده ده خيرلى بيوك سَوينجلر اولاجق. محكمه‌ده سز ده آڭلاديڭز كه، حتّى قانونلريله ده هيچ بر جهتله بزى محكوم ايده‌مدكلرندن، أهمّيتسز، سينك قنادى قدر قانونله تماسى اولميان جزئى مكتوبلرڭ جزئى خصوصياتى گبى جزئى شيلرى مدارِ بحث ايدوب بيوك و كلّى مسائلِ نوريه‌يه ايليشمگه چاره بولامديلر. هم غايت كلّى و گنيش نور طلبه‌لرى و رسالۀِ نورڭ بدلنه يالڭز شخصمى چوروتمك و أهمّيتدن إسقاط ايتمك بزم ايچون بيوك بر مصلحتدر كه، رسالۀِ نور و طلبه‌لرينه قدرِ إلٰهى ايليشديرمييور. يالڭز بنم شخصمله مشغول ايدر. بن ده سزه و بتون دوستلريمه بيان ايدييورم كه