برنجى كلمه: {اَلْحَمْدُ ِﷲِ} در. بونده‌كى حجّتِ ايمانيه‌يه غايت قيصه بر إشارت

أوت كائناتده مدارِ حمد و شكر اولان قصدى إنعاملر و نعمتلر، خصوصًا قان و فيشقى ايچندن صافى، تميز، غدالى سوتى عاجز ياورولره گوندرمك و إختيارى إحسانلر و هديه‌لر و مرحمتلى إكراملر و ضيافتلر زمين يوزينى، بلكه كائناتى طولديرمش. اونلرڭ فيآتى دخى؛ باشده بسم اﷲ، آخرده الحمد ِﷲ، اورته‌ده نعمتده إنعامى حسّ ايتمك و ربّنى اونڭ ايله طانيمقدر. سن كندى نفسڭه، معده‌ڭه، طويغولريڭه باق! نه قدر شيلره، نعمتلره محتاجدرلر. و نه درجه حمد و شكر فيآتيله رزقلرى، لذّتلرى ايسترلر، گور؛ هر ذى‌حياتى كنديڭه قياس أيله. ايشته بو عمومى إنعاملر مقابلنده حال و قال ديللريله ايديلن حدسز حمدلر، پك قطعى بر صورتده بر معبودِ محمود، بر منعمِ رحيمڭ موجوديتنى و عمومى ربوبيتنى گونش گبى گوسترر

ايكنجى كلمه: {رَبِّ الْعَالَمِينَ} در. بونده‌كى حجّته غايت قيصه بر إشارت

أوت بز گوزيمزله گورويورز كه: بو كائناتده بيڭلر دگل، بلكه ميليونلر عالملر، كوچك كائناتلر، أكثرى بربرى ايچنده، هر برينڭ إداره‌سى و تدبيرينڭ شرائطى آيرى آيرى اولديغى حالده، اويله بر مكمّل تربيه، تدبير، إداره ايديلييور كه؛ بتون كائنات بر صحيفه گبى هر آن نظرنده و بتون عالملر برر سطر گبى قلمِ قدرت و قدريله يازيلير، تازه‌لنير، دگيشير. بر نهايتسز ربوبيت ايچنده نهايتسز بر علم و حكمت و إحاطه‌لى حدسز بر رحمت و دقّت ايله بو ميليونلر عالملرى و سيّال كائناتلرى إداره ايدن بر ربّ العالمينڭ وجوبِ وجودينه و وحدتنه كلّى و جزئى شهادتلر، ذرّه‌لر و ذرّه‌لردن تركّب ايدن موجودلر عددنجه حدسز، نهايتسز شهادتلر هر آن و زمان گلييورلر. ذرّات تارلاسندن تا منظومۀِ شمسيه‌يه، تا صمان يولى دينيلن كهكشان دائره‌سنه و بر حجيرۀِ بدندن تا زمين مخزننه، تا كائنات هيئتِ مجموعه‌سنه قدر عين قانون، عين ربوبيت، عين حكمت ايله برابر إداره و تربيه ايدن بر ربوبيتى تصديق و حسّ ايتمه‌ين، بيلمه‌ين، گورمه‌ين بر إنسان، ألبته حدسز بر عذابه كندينى مستحق ايدر و مرحمته لياقتنى سلب ايدر