(اوچنجى مدرسۀِ يوسفيه‌ده موقّت پك آز بر زمانده تجريددن تماسه نقلمده ويريلن يالڭز بر تك درسڭ ايكنجى قسمى

حپسده نور شاكردلرينه قيصه‌جق بر درس نمونه‌سيدر. او ده شودر

فاتحۀِ شريفه دڭزندن بر قطره و گونشنده‌كى ألوانِ سبعه يعنى ضياسنده‌كى يدى رنگندن بر تك لمعه بيان ايتمگى، نمازده‌كى فاتحه قلبه أمر ايتدى. گرچه يگرمى طوقوزنجى مكتوبڭ بر قسمنده، خصوصًا ”نَعبُدُ“ ”نون“نده‌كى سياحتِ خياليه و رموزِ ثمانيه‌ده و إشارات الإعجاز تفسيرنده و سائر نور أجزالرنده بو قدسى خزينه‌نڭ چوق طاتلى و گوزل نكته‌لرينى يازمشز. فقط او پك شيرين خلاصۀِ قرآنيه‌دن يالڭز ايمانڭ ركنلرينه و حجّتلرينه إشاراتنى، غايت قيصه بر مختصر خلاصه‌سنى برنجى قسمده‌كى طرزِ إفاده گبى، كندم نمازده‌كى تفكّريمى يازماسنه بر جهتده مجبور اولدم. {بِسْمِ اﷲِ الرَّحْمٰنِ الرَّحِيمِ} كلمه‌سنى نورڭ ايكى اوچ رساله‌لرينه حواله ايدوب {اَلْحَمْدُ ِﷲِ} دن باشلايورم