اوچنجى كلمه: {اَلرَّحْمٰنِ الرَّحِيمِ} در. بونده‌كى حجّته غايت قيصه بر إشارت

أوت كائناتده حدسز رحمتڭ موجوديتى و حقيقتى، عينًا گونشڭ ضياسى گبى گورونور. و ضيانڭ گونشه قطعى شهادتى مِثللو، بو گنيش رحمت دخى، پرده آرقه‌سنده بر رحمٰنِ رحيمه شهادت ايدر. أوت رحمتڭ بر أهمّيتلى قسمى رزقدر كه، رحمانه رزّاق معناسى ويريلير. رزق ايسه، او درجه ظاهر بر طرزده بر رزّاقِ رحيمى گوسترر كه؛ ذرّه قدر شعورى بولونان تصديقه مجبور اولور. مثلا: بتون ذى‌حياتڭ، خصوصًا عاجزلرڭ و بِالخاصّه ياورولرڭ، بتون زمينده و فضاده إختيار و إقتدارلرينڭ خارجنده غايت خارقه بر طرزده هيچدن و متماثل چكردكلردن و صو قطره‌لرندن و طوپراق حبّه‌جكلرندن يتيشديرييور. حتّى آغاجڭ باشنده‌كى يوواده قنادسز، ضعيف قوشجقلره آننه‌لرينى أمربر نفر گبى گزديرر، رزقلرينى گتيرتديرر. و آج بر آرسلانى ياوروسنه مسخّر ايدر، ألده ايتديگى بر أتى ييمه‌يوب ياوروسنه يديرر. و سائر حيواناتڭ و إنسانڭ ياورولرينه ممه‌لر موصلغندن آبِ كوثر گبى خوش، مُغَدّى، صافى، خالص، بياض سوتلرى قيرمزى قان و ملوّث فيشقى ايچندن بولاشمادن، بولانديرمادن إمدادلرينه گوندرر، والده‌لرينڭ شفقتلرينى يارديمجى ويرر. و بر نوع رزق ايسته‌ين عموم آغاجلره، مناسب رزقلرينى اونلره پك خارقه بر طرزده قوشديرديغى گبى، بر نوع مادّى و معنوى رزق ايسته‌ين إنسانڭ طويغولرينه؛ عقل، قلب، روحلرينه دخى پك گنيش بر سفرۀِ أرزاق اونلره إحسان ايديلييور. گويا كائنات، گُل چيچگنڭ ياپراقلرى و مصر سنبلنڭ گوملكلرى گبى بربرى ايچنده صاريلى، يوز بيڭلر آيرى آيرى، چشيد چشيد سفره‌لردر كه؛ او سفره‌لر عددنجه و اونلرده‌كى طعاملر و نعمتلر مقدارنجه ديللر ايله و آيرى آيرى، كلّى و جزئى لسانلر ايله بر رحمٰنِ رزّاقى، بر رحيمِ كريمى بتون بتون كور اولميانه گوسترر